چئویرن: رقیه کبیری
ترجمه: رقیه کبیری
رقیه کبیری

زامانین کشف ائتمه لذتی، یوخسا متن‌لر چارپیشماسی؟
(ساعاتلار روْمانینا اؤتری بیر باخیش)
رقیه کبیری

ساعاتلارین ثانیه‌سایاری اؤز آخیمیندا، ایسته‌مه‌دن دونیایا آتیلمیش اینسانی هر آن اؤلومه ساری یؤنلدیر. ثانیه‌سایارین آخیمی آرخادان آتیلمیش خیردا بیر داش کیمی او قدر اینجه‌دیر کی، زامان آخیمیندا گؤزه گلمیر، حیسّ اولونمور.
آمئریکالی یازیچی مایکل کانینگهام ساعاتلار رومانینین باشلانغیجیندا گتیرمیش بیر گیریش‌ده ۱۹۴۱- جی ایله ایشاره ائده‌رک ویرجینیا وولف-ون یاشامینین سوْن آنیلاریندان دانیشیب، وولفو تانیمایان اوخوجویا لازیمی قدر بیلگی وئریر. ویرجینیا اؤز أرینه و ها بئله باجیسینا مکتوب یازاندان سونرا تل‌تله‌سیک ائودن چیخیب، اوْوُز چایینا ساری گئدیرکن یوْل اوزو أطرافینی سئیر ائتمه‌یی بئله اونوتمور. بونونلا بئله ایچینده‌کی استرس‌لر و باش‌آغری کیمی بیر هیولا، آنجاق اؤلوم عرفه‌سینده ده اونو راحات بوراخمیر. ویرجینیا ۱۹۴۱- جی ایل ۲۸ مارت تاریخینده جیب‌لرینه چوخلو داش ییغاراق اؤلومونو قطعی‌لشدیریب، بوتون قاچیش یوللارینی اوزونه باغلاماق قصدیله شهر کنارینداکی ائولرینین یاخینلیغیندا آخان اوْوُز چایینا ساری گئدیب اؤزونو چایا آتیب، حیاتینا سون قویور.
یازیچی مایکل کانینگهام اؤزو یازدیغی گیریش‌ده، متندن قیراق، تاریخی بیر باخیمدان ویرجینیا وولفون اؤلومونو روایت ائتمکله ایستر- ایسته‌مز زامان و اؤلوم آدلی عنصرلری، اؤنجه قبول اولونموش (پیش‌فرض) کیمی اونلاری اوخوجونون ذهنینده جانلاندیریب و ائله بیر زمین یارادیر کی یاشامین بو ایکی أساس تملی (زامان و اؤلوم) رومانین سونوناجان اوخوجونو راحات بوراخمیر.
ویرجینیا وولفون یاشامینی و اونون اؤلوم تاریخینی نظرده آلماییب، یالنیز ساعاتلار رومانینا دایاناراق بو روماندا اوچ قادین کاراکتری اوچ مختلیف نسیلدن، اوچ زامان و اوچ آیری- آیری مکاندا نقش ایفا ائدیرلر. بیرینجیسی، وولفون اؤزودور کی ۱۹۲۳- جو ایلده دالووی خانیم رومانینیی یازاراق اؤزونون پسیکولوژیک خسته‌لییی ایله أل‌به‌یاخادیر. ایکینجیسی، براون خانیم آدلی بیر خانیمدیر، ۱۹۴۹- جو ایلده دالووی خانیم رومانینی اوخوماقلا برابر أرینین آد گونو موناسیبتینه اونا شأنلیک تداروکو گؤرمکده‌دیر. اوچونجوسو کلاریس وون آدلی بیر Lesbian قادین‌دیر کی ۲۰۰۱- جی ایلده اؤز شاعیر دوستو و قدیم سئوگیلیسی ریچاردین حال- حاضیردا إیدز خسته‌لییی ایله أل‌به‌یاخا اولدوغونا باخمایاراق، اونون اوچون شأنلیک مجلسی قورماقدادیر. رومان، بو اوچ قادینین بیر گون یاشاییشینین مختلیف زامانلاردا، آنجاق عینی بیر گونده روایتچیسی‌دیر. یازیچی هر کاراکترین یاشاییشینی ژوئن آیی‌نین بیر گونونده سحردن آخشامادک حال- حاضیر زامانیندا، دالووی خانیم، وولف خانیم و براون خانیم آدلی فرقلی فصیل‌لرده روایت ائدیر.
بو روماندا یازیچی کانینگهام دا ویرجینیا وولف کیمی بیلینج آخیشی یازی تکنیکیندن فایدالانیب. وولف خانیمین روایتی ۱۹۲۳- جو ایلده، براون خانیما عایید اولان روایت ۱۹۴۹- جو ایلده و دالووی خانیمین روایتی ایسه اییرمینجی یوز ایلین سونونو إحتفا ائدیر. حال‌بوکی ساعاتلار رومانینین یایین تاریخی ۱۹۹۸- جی ایله قاییدیر. رومانین روایت قالیبی زامان باخیمیندان دؤرد یئره بؤلونور: تقویمی زامان، اوزاق کئچمیش، یاخین کئچمیش و گله‌جک. بو دؤرد زامان آراسیندا قیریلماز بیر باغلانتی وار. بو قیریلماز باغیم ویرجینیا وولفون یاراتدیغی دالووی خانیم رومانینا دایاناراق، زامان ایله یاشام و اؤلوم عنصرلرینه عایید ذهنی چارپیشمالار دا یارادیر.
کانینگهام بو روماندا اوخوجونو تقویمی ، روایی ، و حیسّی زامان ایله قارشی قارشییا قویور. یازیچی هر اوچ کاراکتره عایید اولان روایت‌لرده تقویمی زامانی قئید ائتسه ده، حال- حاضیر زامانیندا روایت ائدیرکن، قادینلارین یاشادیغی زامانلاری بیر- بیرینه باغلاییب، اوسته‌لیک، تقویمی زامان واسیطه‌سی کئچیدیله اؤز رومانینی فورملاشدیریب، کیتابین فصیل‌لری آراسیندا زامانا عایید اؤزل بیر هارمونی یارادیب. او، فوْرم واسیطه‌سیله بو هارمونو‌نو ایندیکی حال- حاضیر زامانیندا اوخوجویا چاتدیریر و اوخوجو هر اوچ کاراکتره باغلی اولان حادیثه‌لری حال- حاضیرده‌ اوز وئردییی کیمی حیس ائدیر.
رومانین چاپ اولدوغو ایلی (۱۹۹۸) نظرده آلاراق فصیل‌لرین ترتیبی بئله‌دیر. (دالووی خانیم، وولف خانیم، براوون خانیم)، (دالووی، وولف، براون)، (وولف، دالووی، براون)، (وولف، دالووی، براون)، (وولف، دالووی)، (وولف، دالووی)، (براون، دالووی)، (براون، وولف)، (براون، دالووی)
و تقویمی زامان هارمونوسو: (گله‌جک، اوزاق کئچمیش، یاخین کئچمیش)، (گله‌جک، اوزاق کئچمیش، یاخین کئچمیش)، (اوزاق کئچمیش، گله‌جک، یاخین کئچمیش)، (اوزاق کئچمیش،گله‌جک، یاخین کئچمیش)، (اوزاق کئچمیش، گله‌جک)، (اوزاق کئچمیش، گله‌جک)، (یاخین کئچمیش، گله‌جک)، (یاخین کئچمیش، اوزاق کئچمیش)، (گله‌جک، یاخین کئچمیش).
رومان، کلاریسا وون‌ آدلی ائش‌جینسل (Homosexual) بیر قادینین روایتی ایله باشلانیر و اونا عایید بیر بؤلومله ده سونا چاتیر. کلاریسا جوان بیر قیز اولاراق، وولفون دالووی خانیم رومانینین کاراکتریله آداش اولدوغو اوچون أسکی سئوگیلیسی ریچارد، اونا دالووی خانیم لقب وئریب. ایندیسه کلاریسا و ریچارد ایکی أسکی یولداش کیمی ایلگیله‌نیرلر. حادیثه‌لرین هامیسی اییرمینجی یوز ایلین سونوندا ژوئن آیینین عینی بیر گونونده، نیویورک شهرینده اوز وئریر. کلاریسانین قیزی جولیا، اسپرم بانکینین تؤره‌مه‌سی‌دیر. جولیا دا آناسی کیمی ائش‌جینسل‌دیر. اوسته‌لیک، کلاریسانین پارتنری ده اونلارلا برابر بیر ائوده یاشاییر. کلاریسا او گونون آخشامی ریچاردین ادبی اؤدول آلدیغینا گؤره بیر قوناقلیق وئرمه‌لیدیر. ریچارد ایسه بای‌سئکسوال Bisexual بیر کیشی اولاراق إیدز ناخوشلوغونا معروض قالدیغی اوچون ساغلاملیق دورومو هئچ یاخچی دئییل. کلاریسا دالووی خانیم رومانینین کاراکترینه تای سحر چاغی قوناقلیق تؤره‌نینه گول آلماق اوچون ائودن چیخیب و نیویورک شهرینده مقصدینه گئدرکن أطرافینداکی حادیثه‌لرین تاثیری آلتدا ذهنی کئچمیش گونلره دوغرو یؤنه‌لیر. دالووی خانیم رومانی ایله پارالل کلاریسا دا آدلیم بیر آدامی خیاواندا گؤرور. آنجاق ساعاتلار رومانینداکی او آدلیم آدام ملکه‌ یوخ، بلکه اییرمینجی یوز ایلین سونوندا تانینمیش بیر سینما آکتورودور. نیشانه‌لره گؤره معلوم اولور اییرمینجی یوز ایلین سونوندا آکتورلارا ملکه‌لر کیمی قیمت وئریلیر. یازیچی بو حادیثه‌نی روایت ائدن پاراقرافدا زامان تأثیری آلتدا کولتورل ده‌ییشیکلییی ۱۹۲۳- جو ایلدن ۲۰۰۰- جی ایله‌دک گؤسترمکده‌دیر. کانینگهام «دالووی خانیم» بؤلومونده چالیشیر حادیثه‌لری ویرجینیا وولفون یازدیغی دالووی خانیم رومانینن حادیثه‌لرینه بنزتسین.
ساعاتلار رومانینین هر اوچ بؤلومونده اؤپوشمک کیمی عاطیفی بیر داورانیش گؤرونور. ریچارد کلاریسانی اؤپمک ایسته‌دیکده، کلاریسا یاناغینی اونا ساری چئویرر. اؤپوشمک کیمی بیر موتیف وولف خانیم و براوون خانیم بؤلوم‌لرینده ده دیققت چکیر. نظره گلیر بو موتیف هر اوچ بؤلومده اؤزل بیر نیشانه‌ کیمی ‌قیمتله‌نیر. یازیچی ایسه بو نیشانه واسیطه‌سیله نه‌ییسه گؤسترمه‌یه چالیشیر.
دالووی خانیما عایید بوتون بؤلوملر حال- حاضیر زامانیندا و اوچونجو شخصین باخیش آچیسی ایله روایت اولونور. یازیچی بو بؤلومون باشاباشیندا اییرمینجی یوز ایلین سونوندا، آمئریکا اؤلکه‌سینه حاکیم اولان اؤزل مدنی کوْدلاری گؤسترمک واسیطه‌سیله ائش‌جینسل‌لیک مسئله‌سینه عادی بیر مسئله کیمی توخونور. او، اینسانلارین جینسی مئییل‌لری ایله اونلارین اؤزل سئچیم‌لری آراسیندا بیر نؤوع ایلیشیک گؤسترمه‌یه چالیشیر.
وولف خانیما عایید اولان فصیل‌لرده حادیثه‌لر ژوئن آیینین بیر گونونده، ۱۹۲۳- جو ایلده، لندن‌دن یاریم ساعات فاصیله‌سی اولان ریچموند آدیندا بیر یایلاقدا اوز وئریر. بو فصیلین بوتون بؤلوم‌لرینده ویرجینیا، دالووی خانیم رومانینی یازماقدادیر. ویرجینیا اوچون اؤنملی اولان بودور کی رومان أن گوجلو بیر اثر اولسون. گونده‌لیک یاشاییشدا اوزبه‌اوز اولان خیردا مسئله‌لر دالووی خانیم کیمی کاراکتر یاراتماقدا اؤز تاثیرینی یازیچییا بوراخیر. دئمک، یازیچی ایله یاراتدیغی کاراکتر آراسیندا دیالکتیکی بیر ایلگی وار. یازیچینین شخصی أحوالاتی اونون یاراتدیغی کاراکترده تأثیر بوراخیب و روماندا یارانمیش حادیثه‌لر پراسسی ویرجینیانین شخصی یاشاییشیندان علاقه‌سیز دئییل.
لندنه گئری دؤنمک فیکریندن علاوه زامانین ده‌یری و اؤلوم مسئله‌سی ویرجینیانین أصلی دغدغه‌لریندندیر. ویرجینیانین باجیسی ونسا اوشاقلاری ایله برابر اونون ائوینه قوناق گلیرلر. اوشاقلار یول اوزو یارالی بیر قوش تاپیب، ویرجینیانین حیطینده اونلار اوچون قوشا تابوت کیمی بیر یئر حاضیرلاییب، اوستونه گول قویورلار. ویرجینیانین ذهنی اؤلوم مسئله‌سی ایله چارپیشماقدا اولارکن یارالی و اؤلو قوشون یئرینده اولماغی آرزولاییر. همین گون ویرجینیا باجیسی ونسانین دوداغینی معصوم‌یانا اؤپندن سونرا دادلی و ممنوعه بیر لذت آلیر. او، ایکی هاوالیدیر. اؤلوم ایله اضطرابلی یاشام آراسیندا هانسینی سئچمک اوچون اؤز ایچینده تارتیشما کئچیر. اونون بو جور ایکی هاوالی اولدوغو دالووی خانیم رومانیندا بئله اؤزونو گؤستریر. رومانین سونوندا دالووی خانیم یا همن کلاریسا انتحارلا یاشاماق آراسیندا قطعی قرارا چاتا بیلمیر. بونونلا بئله نهایت کلاریسانین یاشاماغینا قرار وئریر. ویرجینیا بؤلومونون باخیش آچیسی اوچونجو شخصین دیلیندن و حال- حاضیر زامانیندا روایت اولونور.
اوچونجو بؤلومده لورا براون، بیر ائو قادینی اولاراق ایکینجی اوشاغینا بوْیلودور. او، ۱۹۴۹- جو ایلین ژوئن آیینین بیر گونونده لوس‌آنجلس شهرینده، یاتاغیندا یاتارکن دالووی خانیم رومانینی اوخوماقدادیر. رومانی اوخویورکن، یئریندن قالخیب، أرینه و اوچ یاشلی ریچی آدلی اوغلونا سحر یئمه‌یی حاضیرلاسین، یوخسا رومانین آردینی اوخوماق آراسیندا ایکی هاوالی قالیب. اوغلونون و أرینین سسی مطبخدن گلیر. یئریندن قالخماق ایسته‌دیکده گئنه ده بیر ایکی صحیفه روماندان اوخویور. او گون أرینین دوغوم‌گونودور. لورا چالیشیر گونده‌لیک یاشامینین معناسیزلیغیندان دوغولان استرس‌لره غالیب گلسین. أرینین دوغوم‌گونونو قوتلاماق اوچون کئیک پیشیرمک قرارینا گلیر، بلکه بئلنچی ایشلرله یاشامینا بیر نؤوع معنا وئرسین. بو آرادا قونشو قادین، کیتی، اونون ائوینه گلیب و اوشاقلیغیندا بیر وز تاپیلدیغینی و جراحی عملیاتینین گرکلی اولدوغونو اونا خبر وئریر. لورا همدردلیک اوزره اونو باغرینا باسیر. بو آن هر ایکیسینین دوداقلاری بیر- بیرلرینه یاخینلاشسادا، بیربیرلرینی اؤپمورلر. هر ایکیسی ده گؤردوکلری ایشین نه‌لییینی یاخچی باشا دوشورلر. هر ایکیسی ده اوزاقلارا دالیرلار. ۱۹۴۹-جو ایلده یقین کی ائش‌جینسل‌لیک مئسله‌سی آمئریکادا تابو کیمی ده‌یرلندیریلیرمیش.
لورانین استرسی، قونشو قادینی یولا سالاندان سونرا داها دا آرتیر. او، اؤزوندن و گؤردویو ایشدن راضی دئییل. پیشیردییی کئیکی زیبیل‌قابینا آتیب، باشدان یئنی بیر کئیک پیشیریر. دالووی خانیم کیتابینی گؤتوروب، سونرا اوچ یاشلی اوغلونو قونشولارین بیرینه تاپشیریب، ائودن چیخیر. یاشاییشی اونو تالواسایا سالیب. هر ندن یورولموش، هر ندن بئزمیش بیر حالی وار. ده‌لی اولماق قورخوسو هئچ ده بعید دئییل. آمما یقینی وار تالواساسینا، استرسینه غلبه ائتمک اوچون تکجه بیر یول وار. اگر ائودن اوزاق بیر یئرلرده تک- تنها قالیرسا بو یولو تاپا بیلر. ضدّیتلی فیکیرلر ذهنینه گلیر. عین زاماندا، استرسلی ‌اولدوغو حالدا، اؤز گئیینیشیندن، ماشینینین تمیزلیییندن، قولاغینا سالدیغی سیرغالاریندان راضیلیق حیسی وار. یاخچی بیلیر کی رستوران و یا کیتابخانا کیمی عومومی یئرلره گئتسه، اورالاردا اؤزو اولماییب، اؤزو ایسته‌مه‌دن روْل اویناماق مجبوریتینه معروض قالاجاق. اونا گؤره ده عومومی یئرلره گئتمکدن چکینیر. خیانت ائدن قادینلار کیمی سونوندا بیر هوْتئلده اوتاق توتوب، ایکی ساعاتلیق واختینی اورادا کئچیریر. اؤزونو یاساق ایش گؤرن قادینلار کیمی حیس ائدیر. قورخور هوتئلین مودیری اونو جینسل‌ایشچی کیمی تانیسین. اوتاغا گیریب، یاتاقدا اوزانیرکن یاشاییشینی ترک ائتمیش قادین حیس‌لری اونا غالیب گلیر. نظرینه گلیر ویرجینیا وولف دا اؤز انتحاریندان اوّل بئله بیر اوتاقدا قالمیشدی. اؤز فیکرینه گولمه‌یی توتور. او دا بو اوتاقدا هر ایش گؤره بیلر. گاهدان گرده‌ک یاتاغیندا یایلانمیش بیر گلین کیمی حیس ائدیر اؤزونو. آمما نه أرینی گؤزله‌ییر، نه ده بیر آیری کیشینی. هوتئلین اوتاغیندا یالنیز اؤزویله دالووی خانیم رومانی آراسیندا ممنوعه بیر وارلیق باخیمیندان برابرلیک دویور. نظرینه گلیر هوتئل اوتاقلاریندا اؤلمک چوخ آسان بیر ایش اولا بیلر. بللی دئییل ایندییه‌جن او یاتدیغی یاتاقدا نئچه نفر اؤزونو اؤلدوروب. بطنینده‌کی کؤرپه‌نی دوشونورکن، یقینی وار اؤزونو اؤلدورمه‌یه‌جک. بونونلا بئله بو نتیجه‌یه چاتیر کی، اؤزونو اؤلدورمک بیر هوتئل اوتاغینا گلمک کیمی ساده بیر ایش‌دیر. هوتئلدن چیخیب، ائوینه ساری دؤنور. أرینین دوغوم‌گونونو یالنیز اوچ یاشلی اوغلو ریچی ایله جشن توتورلار. أرینین کوْبوت و آبتال اولدوغونو دوشونورکن، عؤمور بویو بو ائوده تله‌یه دوشموش کیمی حیس ائدیر اؤزونو. دالووی خانیم رومانینین بیر پارچاسی ذهنینده گزیر. آن‌باشی اؤزونه وورغولاییر: «عیبی یوخدور… عیبی یوخدور»… قونشو قادین، کیتی، مریضخانادا اؤلوم ایله اوزبه‌اوز دالاشاراق، او ایسه أرینین و اوغلونون کناریندا اؤزونو أمنیت ایچینده حیس ائدیب و بو أمنیت حیسی اونو ساکینلشدیریر. ویرجینیا بؤلومونه تای لورا براون بؤلوم‌لری ده حال- حاضیر زامانیندا و اوچونجو شخصین باخیش آچیسیندان روایت اولونور.
بو اوچ بؤلومده اوز وئرن حادیثه‌لردن علاوه، یازیچی نسه عاطیفی بیر داورانیشی گؤسترمکدن دانیشماغا چالیشیر. هر اوچ بؤلومده ده نیشانه‌لر ایله گؤستریلن بو عاطیفی داورانیشا ایکی آچیدان باخماق مومکوندور. بیرینجیسی، بو عاطیفی عمل قادینلارین ائش‌جینسل‌لییه مئیل‌لرینی گؤسترمک نیشانه‌سی اوْلا بیلر. منجه لورا براون ایله قونشوسو کیتی آراسیندا، و ویرجینیانین باجیسی ایله اؤپوشمه‌یی و ممنوعه بیر حیس یاشاماقلاری ۱۹۲۳ و ۱۹۴۹- جو ایللرده عرف و قانون باخیمیندان ائش‌جینسل‌لییین نئجه ده‌یرلندیرمه‌یین گؤستریجیسی‌دیر. لاکین رومانین دالووی خانیم بؤلومونه گلدیکده، ریچارد انتحار ائتدییی گونون سحریسی کلاریسانی اؤپمک ایسته‌دیکده کلاریسا ایکی هاوالی قالمیش بیر حالدا یاناغینی ریچاردا ساری چئویریر. بو داورانیش اییرمینجی یوز ایلین سونوندا بیر قادینین ائش‌جینسل اولدوغونا گؤره آیری بیر جینسیته مئییل گؤسترمکده ایکی هاوالی قالماغینین گؤستریجیسی‌دیر. هله ده گنج بیر قیز ایکن گؤل قیراغیندا ریچارد ایله اؤپوشمه‌سی یادداشیندادیر. ریچارد ایسه او گونو یئنیدن تکرار ائتمک ایسته‌سه ده، کلاریسا بیرباشا بو عاطیفی داورانیشا قاتیلمیر، یاناغینی ریچاردا ساری توتوب، یالنیز اونون اؤپوشونو تحویل آلیر. بو بؤلومو روماندا اوخویارکن گوستاو کلیمت‌ین اؤلوم اؤپوشو تابلوسو ذهنیمده جانلانیر.
آیری بیر آچیدان بو عاطیفی داورانیشی اؤلومله اؤپوشمک کیمی ده تأویل ائتمک اولار. هر اوچ بؤلومده فرقلی سببلردن آسیلی اولاراق اؤلوم مسئله‌سی ویرجینیا، براون خانیم و ریچاردین ذهنینی مشغول ائدیر. ویرجینیانین ألینده یازدیغی کیتابین دغدغه‌سی و براون خانیمین بطنینده‌کی کؤرپه‌سی ایله اوچ یاشینداکی اوغلو سبب اولور اونلار اؤلوم یئرینه یاشاییشا باغلی قالسینلار. آنجاق إیدز ناخوشلوغوندان یورولوب، یاشاییشدان أل اوزموش ریچاردین هر بیر شخصه، حتی هر گون اونو گؤرمه‌یه گلن کلاریسایا بئله باغلیلیغی اوزولوب، نهایت، بو مسئله‌ عملی شکیلده اؤلوم سئچکیسیله یئکونلاشیر.
اؤلوم مسئله‌سی ده زامان مسئله‌سینه تای دالووی خانیم رومانی ایله ساعاتلار رومانینین اوْرتاق نؤقطه‌لریندن ساییلیر. یازیچیلارا گؤره هانسیسا بیر رومان اؤزوندن اؤنجه یازیلمیش رومانلارین مئیوه‌سی کیمی ده‌یرله‌نیر. بونونلا بئله چوخ زامانلار بو مئیوه‌نین هانسی رومانلاردان بارلانماسی هله معلوم اولمور. آمما ساعاتلار رومانیندا یازیچی بوتون گوجونو صرف ائدیر تا نیشانه‌لر واسیطه‌سیله بو نکته‌نی اوخوجویا چاتدیرسین کی اونون یازدیغی رومان دالووی خانیم رومانینین مئیوه‌سی‌دیر. دالووی خانیم رومانینین قطعه‌لری بو رومانی بزه‌ین و گؤزه گتیرن کاشی‌ دوزمه‌لرینه بنزه‌ییر.
ژرار ژنت‌ین ترامتنیت (transtextuality) نظریه‌سی ایله بو متنه یاناشسام دالووی خانیم و ساعاتلار رومانینین آراسینداکی موناسیبتی (Intertextuality) یا متن‌لر آراسینداکی موناسیبت تکنیکی آدلاندیرمالییام. ژنتین نظریه‌سینه گؤره بو تکنیکی اوچ حالتده متن‌لر آراسیندا گؤرمک مومکوندور. بیرینجی حالدا یازیچی مبدأ متن یا متن‌لرین نه اولدوغونو گیزلتمه‌یه چالیشیر و بو گیزلی ساخلاماق ادبی اوغورلوق آنلامینا گلیر. ایکینجی حالدا یازیچی آیدین نیشانه‌لر ایله دیرناق آراسیندا و یا مستقیم قایناق وئرمکله مبدأ متنین ایزینی گؤستریر. اوچونجو حالتده یازیچینین قصدی یوخدور متن‌لر آراسینداکی موناسیبتی گیزیلی ساخلاسین. بونونلا بئله صراحتله قایناق وئرمکدن ده چکینیب و اؤزل نیشانه‌لر واسیطه‌سیله بو موناسیبتی گؤستریر. بئلنچی بیر حالدا یالنیز مبدأ متنی اؤنجه‌دن اوخویان اوخوجولار متن‌لر آراسینداکی موناسیبتی سئچه بیلرلر. منه گؤره کانینگهام ساعاتلار رومانیندا متن‌لر آراسینین اوچونجو نؤوع تکنیکیندن فایدالاناراق بو رومانا اؤزل بیر قورولوش فورمونو باغیشلاماقدان علاوه، هر اوچ بؤلومده چالیشیر اوخوجونو دالووی خانیم رومانینا ارجاع وئرسین.
ساعاتلار رومانیندا دالووی خانیم رومانی اوچ ضلعی برابر اولان بیر مثلث‌ین ثقل مرکزی، و لورا براون، ویرجینیا و کلاریسانین یاشاییشی ایسه اوچ زاویه‌‌ده قرار تاپیر. بو اوچ قادینین یاشاییشلاریندا فرقلی تاریخلرده، ژوئن آیینین بیر گونونده اوز وئرن حادیثه‌لرین هامیسی بو ثقل مرکزیندن (دالووی خانیم روما‌نیندان) مستقیم تأثیر آلیر.
اؤنجه‌ وورغولادیغیم کیمی هرچند بو قادینلارین روایتی اوچ فرقلی تقویمی تاریخلره عاییددیر، آمما هر اوچ بؤلوم حال- حاضیر زامانیندا روایت اولدوغونا گؤره اوخوجو رومانین اوخونوش پراسسینده زامان فرقینی اونودور. دئمک، رومانین حیسی زامانی، تقویمی زامانین اوستونو اؤرتور. نئجه کی دالووی خانیم رومانیندا حال- حاضیر زامانیندا هر هانسی بیر عادی گونده‌لیک عمل کلاریسانی کئچمیشینه آپاردیغی کیمی بو رومانین هر اوچ بؤلومونده ده هر اوچ کاراکتر هر هانسی بیر نیشانه یا نیشانه‌لر واسیطه‌سیله دالووی خانیم رومانینا ارجاع وئریلیر. یالنیز رومانین سونوندا، ریچارد اؤزونو پنجره‌دن یئره آتدیقدان سونرا لورا براون کلاریسانین ائوینه گلدیییی آن تقویمی زمان، حیسی زامانی آرخادا بوراخیب و اوخوجونو اییرمینجی یوز ایلین سون ایلینه قایتارماغی باشاریر. و بو آندا معلوم اولور براون خانیم یا همن اوچ یاشلی ریچی‌نین آناسی، همن اؤدول قازانمیش و إیدز ناخوشلوغونا مبتلا اولان ریچاردین آناسی‌دیر. کانینگهام متن‌لر آراسینداکی تکنیکدن یارارلاناراق بئله بیر قورولوش فورمونو یاراتماق ایله اوخوجونون ذهنینده تارتیشما یاراتماقدان علاوه متن‌لر آراسیندا چارپیشما دا یارادا بیلیر. آنجاق بئله بیر قورولوش فورمو سبب اولور اؤنجه‌دن دالووی خانیم رومانینی اوخوموش اوخوجو آن‌باشی او رومانا مراجعت ائدیب، یئنیدن ساعاتلار رومانینا دؤنسون. بئله‌لیکله ایکی متن آراسیندا جدی بیر چارپیشما یارانیر.
ایللردن سونرا ایکینجی د‌فعه ساعاتلار رومانینی بیرباشا اوخودوغومدان سونرا کیتابی یئره قویوب، آیری بیر ایشه مشغول اولاندا بئله، رومانین اوچ کاراکتریندن ایکیسی، لورا براون ایله کلاریسا وون، یاپیشقان کیمی ذهنیمدن قوپموردولار. ندنسه رومانین اوچونجو کاراکتری، ویرجینیا وولف، همیشه قیراقدا قالیردی. آمما ندن وولف کیمی بیر کاراکتر منیم ذهنیمدن قیراقدا قالیردی؟!
بونا باخمایاراق کی کانینگهام متن‌لر آراسینداکی موناسیبتدن فایدالاناراق چالیشیب بو روماندا کلاریسا و لورا کیمی کاراکترلری ویرجینیا وولفون کؤلگه‌سینده ساخلاسین، ندنسه متندن کنارداکی ویرجینیا وولفا عایید ذهنیمده وار ساییلان بیلگی‌لر، اوسته‌لیک، رومانین باشلانغیجیندا ویرجینیا وولفون واقعی اؤلوم لحظه‌لرینین روایت ائتمه‌یی سبب اولدو اوخوماق پراسسینده رومانداکی ویرجینیا ایکی آیری کاراکتر کیمی (لورا براون و کلاریسا وون) منیم ذهنیمی چارپیشمایا چکمه‌سین. دئمک اولار ایکینجی ده‌فه بو رومانی اوخویاندا ویرجینیایا عایید منیم کشف ائتمه لذتیم یاریمچیلیق قالدی.
آرتیرمالییام ویرجینیا وولف، دالووی خانیم رومانینی یازماغا باشلایاندا اؤنجه اونا ساعاتلار آدی وئرمیشدی. ندنسه بو رومان دالووی خانیم آدی ایله چاپ اولوب!
۱۷/۶/۹۶

چاپ

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

زامانین کشف ائتمه لذتی، یوخسا متن‌لر چارپیشماسی؟ (ساعاتلار روْمانینا اؤتری بیر باخیش) / رقیه کبیری

رقیه کبیری
www.ishiq.net

آذربایجان ادبیات و اینجه‌صنعت سایتی

زامانین کشف ائتمه لذتی، یوخسا متن‌لر چارپیشماسی؟ (ساعاتلار روْمانینا اؤتری بیر باخیش) / رقیه کبیری

رقیه کبیری
www.ishiq.net

آذربایجان ادبیات و اینجه‌صنعت سایتی

زامانین کشف ائتمه لذتی، یوخسا متن‌لر چارپیشماسی؟ (ساعاتلار روْمانینا اؤتری بیر باخیش) / رقیه کبیری

رقیه کبیری
www.ishiq.net

آذربایجان ادبیات و اینجه‌صنعت سایتی