بوز گئجه‌نین
گیزلین گیله‌سینده
بارماقلاریم اویانیر،
اویناییر
اوره‌ییم دیکسینیر،
دامارلاریم قورویور.
یوخومون،
شیرین دیلی توتولور…
ساییق بارماق‌لار!
تله‌سیک
تلقرامی
آختاریر،
بیر صحیفه‌ده
دونوخور؛
یازیلاردا
قااااااااااچیر
بیر سؤزجوک‌ده،
گؤزلری
دایانیر
هئئئئی ایسلانیر…
«اولدوز»
ساده‌جه سؤزجوک دئییل
دویغولو شعر دفتری‌دیر
ریاسیز سربست‌لر،
یاشیل سؤزلردیر …
بارماقلاریمین آلتیندا
قیرخ درجه
قیزدیرماسیندا
یازیق اولدوز
یانیر
آلوولانیر
جان وئریر …
اولدوزون خاطیرین
آغیر دومان
قیران گومان توتوبدور
توزلو گئجه‌نین سونوندا،
بیر کؤرپه رومان دوروبدور
نفسلری
یا
وا
ش
یا
وا
ش
اوره ییمده
یول
گئدیر …
