يالقيزليق، دويغولار، دوشونجه‌لر(سندلی اوزون حیکایه- بیرینجی بؤلوم)
نريمان ناظيم

nariman nazim

گؤزلريني آچماميشدان اوول اوزون- اوزون دوشونوردو. آياقلاري‌نين آلتيندان قوپان زوققولتونون سسينی سانكي ائشيديردي. آياق‌لاري، ايچيندن آليشيب يانيردی. آناسي‌نين كؤمور اوتوسو یادینا دوشدو. «ايندي بو آياق ايله لاپ پالتار دا اوتوله‌مك اولار» فیکری‌له ذوداغي قاچدي. بيرجه آن “گتیرین آ يولداش‌لار، گتيرين پالتارینیزی اوتوله‌ییم!” باغیرماق ایسته‌دی. سونرا آجي- آجي گولومسه‌دي. «اوندا قطعاً منه ده‌لي آدي قويارلار. يوخ، اوندا دئیرلر بو دا داها چکنمیر، دايانا بيلمير».
آياقلاري‌نين زوققولتوسو يئني‌دن ذهنينی بورودو: «گؤر نه ویر-‌سينديردي آياقلاريمين آلتيندا؟! باخ بورا، باخ قانيمداكي آغ گلبول‌لارا، گؤر نه كيشي كيمي دايانيبلار؟! اونلار بيرجه- بيرجه قيريرلار ميكروب‌لاري. ايندیجه‌‌دير كي بوتون قان- قوخونو كوره‌ییب، ائشييه تؤكه‌لر…». بو فيكيردن قات- قات گوجلندي؛ آغری‌نین ذره- ذره جانیندان چیخدیغینی حيس ائله‌دي. «آخ نه قده‌ر كئفي وار بو حالين! آغری نه قده‌ر آجي‌ديرسا، اونون جاندان چیخماسی‌دا ائله او قده‌ر لذتلی‌دیر.  ائله بيل آدام تازادان دونیایا گلير!».
گؤردویو ایشدن هئچ ده پئشيمان دئییلدی. حتي فيكيرله‌شيردي کی «بركه قيسناسالار، بو يول اوندان‌دا پیسینی دئيه‌جه‌يم. ائله قيشقيراجاغام كي  دؤرد قاتین دؤردو ده ائشيتسین»
گؤزلريني آچاركن ديوارا دوشن ايشيغي گؤردو. هميشه كي كيمي ايدي: شيريم-شيريم. چوخدان بري هر گون يوخودان آییلارکن گؤزلرينی ديوارا زيللردي؛ «هاچان ايشيق دوشه‌جك گؤره‌سن؟» آنجاق واختي گليب چاتاردي. اوول سکكير دانا ايشيق لکه‌سی- آلتي- يئددي سانت بير-بيريندن آرالي- يان – يانا دوزولردي. سونرا ایشیق لكه‌لری آستا-آستا آشاغي ساري اوزانماغا باشلاردی؛ اولاردي سکگيز دانا شيريم، ديب- ديبه، بير ايستيقامت‌ده. ايشيق شيريم‌لاري اوزانديقجا اونون‌دا اوره‌یي آچيلاردي، ايشيقلاناردي. آمما بير مئتردن آرتیق اوزانمازدي شيريم‌لار؛ باشلاياردي گودلمه‌يه. گوده‌ليب، گوده‌ليب يئني‌دن اولاردي سککیز دانا لكه؛ نهايت، ایشيق گلدييي يولدان قاييديب، گئده‌ردي. اؤز- اؤزونه دوشونردی: گؤره‌سن ایشيق نئچه دقيقه اونون قوناغي اولور؟ بیله بيلمزدي. بيرگون آنجاق يولون تاپدي. ايشيق دوشجك، باشلادي سایماغا: «هه ، بس بئله…، آلتي يوز اللي‌ني سايانا قده‌ر دايانير، آمما هله یئددی يوزه چاتمامیش یاواشجا سوزولور گئدیر. دئییرم آی ظالیمین بالاسی، قوی هئچ‌اولماسا یئددی یوزو ساییم باری! آخي سندن ساوای كي منيم گؤروشچوم يوخدو»
كئچن گئجه يئديگي کؤتک اونو بورا گلمه‌سي‌نين ايلكين هفته‌لرينه چکیب آپاردی. آجيلي- شيرينلي گونلرينه. او زامان بئله دوشونردي كي بوندان داها آجي گونلر اولا بيلمز، البته آجي‌ایدی‌دا او گونلر، آپ- آجي. اونا گؤره كي ساعات باشي سورغو- سووال‌ایدي، گؤزله‌نیلمر قده‌ر يامان- يوووز، شيلله- ته‌پيك، آمما ان آجيسي شاللاق‌ايدي. خصوصیله آياق آلتيندان ورولان شاللاق؛ اؤز- اؤزونه « لاپ آدامين آخيرينا چيخير بو يولسوز!» دئیه‌ردی.
كيميسيندن ائشيتميشدي کی «شاللاق آدامين دريسينه دئييل، دري‌نين آلتيندا قيوريليب ياتمش بير ايلانا ده‌يير سانكي؛ ايلانی يئريندن سيچرادير. ایلان‌ایسه زهرينی آدامين بوتون ووجودونا چيله‌يه‌يرک، فيشك كيمي گؤزلريندن چيخير»
دوز دئميشدي ائله‌ايدي شاللاق. بونونلا بئله هر نه ايدي، كئچري‌ايدي. اوزاق باشي هوشدان چيخانا قده‌ر ايدي، ياخود آياقلارين كئيمه‌سينه قده‌ر. آغريسي دا قالارقي دئییلدی، کؤچری‌ایدی. آجي- آجي گليرديسه، شيرين- شيرين‌ده گئديردي. بونلارين هاميسي بير ياندا قالسين؛ اوندا، او تك دئييلدي. او گونلرين شيرينليیي‌ده ائله بوراسيندايدي.
اوولجه اوچ نفر ايديلر. سونرا گئجه‌لرين بيرينده نسه بيردن- بيره بند شولوقلاشير؛ گل-گئت سسي، آپار-گتير همهمه‌سي قووزانير. سئللول‌لارين قاپيلاري جيرا- جير‌لا آچيليب اؤرتولور؛ چوخ چكمير، آنجاق اونلارین دا سئللولونون قاپيسي آچيلير؛ بئش نفر ايچري باسيلير؛ قاپي اؤرتولور.
بير اون ایکی مئترلیک اوتاق اولور، سکكيز نفر آدام؛ هره‌سي بير ياندان، هر بيري بير يولدان، آمما ديلك‌لر بيرگه‌ايدي، اورك‌لر ده. خصوصیله گئجه‌لر ياتاندا اوره‌ك‌لر او قده‌ر ياخينلاشاردي كي بير-بيرلری‌نین دؤیونتو سسيني ده دينله‌يه بيلرديلر. ياخينلاشمالي‌اید‌ی‌لار دا، اوره‌ک، اوره‌یه دیره‌ک اولمالی‌ایدی اوردا.
گئت- گئده سينیشيرديلر بو سککیز نفر. دردلريني، كدرلريني بؤلوشوردولر. سورغو- سووالا گئديب قاييدان آدام هر نه قده‌ر ده ايشكنجه‌یه معروض قالميشديسا، سئللولا گيرجك دردلريني باشقالاري‌لا پايلاشيردي. كيميسي سيگار آليشديريب الينه وئريردی، كيميسي قول- قیچين اوووردو. بيريسي شعر ايله، او بيريسي نغمه ايله روحون اوخشايير، باشقا بیریسی قولتوغونا گيريب، او بالاجا اوتاقدا اونو گزديريردي و …
سؤزسوز كي اورادا سئوينجدن خبر اولا بيلمزدي، امما اونلار ویریشيب سئونجي ده تاپيرديلا. گولمه‌لي لطيفه‌لر، شيرين – شيرين خاطيره‌لرله؛ باياتي‌لار، دوبيتي‌لر، قوشمالارلا؛ حزین- حزین اوخونان ماهني‌لارلا. اللري ده بوش قالميردي البته. چؤره‌ك ايچيندن چیخان خميره ليوان ديبينده قالميش شيرين چايين آرتیغینی قاتیردیلار. ساعاتلارلا، گونلرله اونو الده ورزله‌یيرديلر؛ ياري‌یا بؤلوردولر. یاریسینی لوله‌له‌ييب وردنه كيمي سئللولون ديواريندا هرله‌دیردیلر. خمير ديوارين هيسينی جانينا چكیردی؛ قاراليردي. یاریسی‌ایسه اؤز آغليغيندا قاليردي. خمير الدن- اله دولانير؛ ورزله‌نير؛ قير- ساققيزا چئوريليردي. بو خميردن حوصله ايله، سلقه ايله شاهمات مؤهره‌لري، نرد مؤهره‌لري دوزه‌ليردي. دوزلمیش مؤهره‌لر گؤزلري اوخشاييردي؛ اونلارا لذت باغيشلاييردي.
«ياخشي، بس هاني بونلارين صفحه‌سي؟» او دا اولان ايشي‌ایدی. يولون اؤیرنمیشدیلر. بيرجه دانا ايشلنميش، سورتولوب تيغه‌يه چئوريلمیش صابين لازيم ايدي. اونو دا ياواشجا تووالت‌دن چالیب گتیریردیلر. قارامتيل عسگرلیک پتوسونون اوزه‌رينده ائله بير ناخيش ساليرديلار كي، لاپ اولوردو كؤنلوندن كئچن صفحه. بئله‌ليك‌له اويون قورولوردو؛ ياريش‌لار گئديردي…، زامان ديزه چؤكوردو.
*   *   *

آمما روزگار بو ساياقدا قالماميشدي. ياریسيني اؤتوب كئچن بير گئجه‌ده سئللولون شاققيلتي ايله آچيلان قاپيسی‌نين سسينه هامي يوخودان داشلانميشدي. ياري يوخولو- ياري آييق گؤزلر ايله ازگين- اوزگون، بوکولوب يوماغا دؤنموش بير آدامين ايچري‌يه يووارلانماسينی گؤرموشدولر؛ سونرا دا قاپي‌نين باغلانماسينی. باشلانيشي بئله اولموشدو.
بير ساعاتا ياخين تازا گلن آدامین نه دانيشماغا ديلي وار‌یدی، نه گؤرمه‌يه گؤزو. گاهدان بير قیچين قارنينا چکیر اينله‌ييردي. سئللولون ايستي، بوغوناق هاواسي نفس آلماغا ايمكان وئرمير، كيمسه‌دن سس چیخمير. ذهن‌لر يوزلرجه سووال ايله مشغول‌ايدي‌لار. قاپي‌دان يوخاري مفتيلدن توخونموش قفس‌جيكده حبس اولونان لامپانين اينجارسيز ايشيغي آدامین اوزونو ايشيقلانديرير. نئچه دقيقه‌دن بري سليمانين گؤزلري آدامین اوزونده مينجيقلانان ترين ايشيلتيسينا تيكيلي قالميشدي. بيردن يئريندن قالخير، اينينده كي قارا كؤينه‌يینی چیخاريب، آدامین باشي اوستونه گلیر؛ کؤینه‌یی ايله اونون آلني‌نين، بوغازينين ترين دریر. سونرا همن کؤینک‌له آدامی یئلپیله‌ییر. آدام گؤزلرين آچير؛ قارا، شه‌وه گؤزلريندن سانكي سليمانا نور ساچير. سليمان ایاغا قالخيب، فئرينج‌ینين جيبيندن سئللولون گونده‌ليك پاییندان قالميش تكجه سيگاري گؤتورور؛ يانديرير؛ الينه وئرير. آدام تامارزیلامیش کیمی اوچ- دؤرد قولاب‌دا سيگاري ياري‌دان کئچيرير. سليمان مهربان- مهربان اونو سوزوب، ياواشجا سوروشور: “سنين آدين نه‌دير؟ سن کیمسن؟” آدام گؤرله‌نيلمز بير سووال ائشيتميش كيمي گؤزلرين آچيب ديققتله سليمانا باخير. در حال قالخير، اوتورور. ايتي باخيشي ايله دؤرد دؤوره‌ني سوزور. – “بورا هارادي؟ نومره‌سي نئچه‌دي بوسئللولون؟”- دئیه سوروشور. سليمان،-“اون یئددی” دئيير. کیشی “بس نیيه مني بورا گتيريبلر، من يئددينجي نومره‌يه گئتمه‌لی‌ایدیم”- دئيه، قاپي‌يا ساري يؤنه‌ليب قالخير، آمما آياغا دورا بيلمير. سليمان درحال کؤینه‌یی اينينه چكيب، قاپيني چالير. گؤزتچي گلیر؛ قاپي‌نين ال بويدا دربه‌چه‌سين آچير؛ “هَه، نه اولوب گئجه‌نين بو واختيندا؟”- دئيه، سوروشور. سليمان “بو آدامي بورا سهوا گتيریبسيز”- دئيير. گؤزتچي قاپيني آچير؛ “سهوا گتيرميشيك؟ يا سهو گليب‌دی؟”- دئديكده، سسينين تیتره‌ییشی بلله‌نير. ال- آياغيني داغیتمیش حالدا قاپيني باغلايیب، گئدير. آدام قاپي‌نين آغیزيندا قول‌لارينی ديزلرينه، باشينی‌ایسه قول‌لارينا داياميش حالدا اوتوروب، گؤزله‌يير.
سليمان آياق اوسته، باشقالاري‌ایسه اوتوروب، سوكوتا داليرلار. كيميسي سليمانا ايشاره ائده‌رك، “گل اوتور!”- دئییر. سليمان اوتورانلارا قاريشير. چوخ چكمير سئللولون قاپيسي آچيلير، گؤزتچي، قارا بنيز، فئرباش هيئوه‌ره‌نين بيريسي ايله ياناشي قاپينين آغيزيندا دايانيرلار. فئر باش كيشي، “كيمدي او آدام، هانسي‌دي؟” –دئيه، سوروشور. آدام اوتوردوغو حالدا باشين قالديرير. فئر باش كيشي اونو گؤرجك قودوزلاشیر، “بو بيجليك تكجه بو اووره‌شين اليندن گله بيلر”- دئيه، توپو شوتلایان كيمي ته‌پيگين آتير. ته‌پيك آدامین هاراسيندان – سينه، بوغاز، يوخسا آغيزيندان- توتدوغونو كيمسه بيلمه‌يير؛ آنجاق او آرخایا قاوريليب يیخيلير. فئر باش كيشي بير آن دايانير، سونرا “يوخ…، بو منيم ايشيم دئييل، دوكتور گره‌گ اؤزو گلسين”- دئيه، قايیديب، گئدير.
دوكتور یولدایکن هله گليب- چاتماميش يامان- يوووزو باشلاميشدي، “بو گيج قورومساغي كيم گتیریب، آزدیردی بورا؟”- دئيه‌رک ياخينلاشیر. يئتيشجك گؤزتچي‌نين اوستونه شيغايير، “سن اووره‌شه من دئديم بونو هارا آپار، هآرا؟” – دئييب، باغيرديقدا، گوزتچی‌نین قولاغی‌نین دیبینه ائله بیر شیلله قویور کی، که‌بلله‌نیر. اونون آردينجا يئدیگي يوموروق‌ایله گؤزتچي اؤزونو داها ساخلايا بيلمه‌ييب یئره سریلير. دوكتور تكجه «یئددی‌يه دئميشديم يا اون يئددی‌يه» جومله‌سيني تكرار ائده‌رك قودوزجاسينا گؤزتچيني ته‌پيك آلتيندا ازيب، جنازه‌یه چئویریر. سونرا اونو او حالدا بوراخيب، ايچري يوگورور. بيرينجي ته‌پيک‌ايله ديزلريني قوجاقلاييب اوتورموش آدامی يئره اوزادير؛ آياغينی اونون بوغازينا قويوب باغيرير، “من سنين ديلينی آچماسام، سندن اووره‌شم. دیللن! دي گؤروم كيمله دانيشدين؟ بو بير ساعاتي بوردا نه پوخ يئييردين؟” – دئيه، دوكتور بير نئجه يول آياغين گؤتورور، قويور. آدامین دانیشماغینادا آمان وئرمیر. اونون، چاناغیندان چیخمیش گؤزلري آلا- قارانليقدا ايشيلدايير. دینمه‌مه‌سی، حتي بيرجه «آخ»دا بئله دئمه‌مه‌سي دوكتورو داهادا قودوزلاشدیریر. دوکتور آياغي آلتيندا خيريلتی‌يا دوشموش و ال-آياق چالان آداما فيكير وئرمه‌دن، تكجه «ديللن بی‌ناموس، ديللن!» دئيه- دئيه، باغيرماقدا‌یدی. نهایت فئرباش كيشي “اؤلدو دوکتور، اؤلدو، بوراخ!”- دئیه، اونو اؤزونه گتیریر. دوکتور کیشی‌نین بوغازین بوراخیر، آمما هله تؤوشه‌یین آلمامیش ال آتیر آدامین توپوغوندان یاپیشیر. وحشیجه‌سینه ائشیگه چکیب، بند اوزونو قاپی‌یا ساری سورویور.
دوكتورون باغيرتيسي اوزاقلاشديقجا، یئرده قالميس گؤزتچي‌نين اينيلتيسي ائشيديلير. او هردن بير «قارا كؤينك‌لی، قارا کؤینک… »- دئيه، قيمیلدانيردي.
*   *   *
سوکوتا دالميش سئللولدا سس‌سیزلیک گئت- گئده آغيرلاشيردي. گؤزتچي‌نين آغيزیندان چيخان سؤزون معناسی و اوندان دوغولا بيلن فاجیعه هاميني دوشوندوروردو. كيميسي تحكکوم ايله «دور سليمان، دور چیخارت او كؤينه‌یي!”- دئيير. سليمان آياغا دورور؛ دوداقلاريني بير- بيرينه سیخاراق کؤنولسوزجه‌سینه کؤینه‌یی اينيندن چیخارير. كؤينك الينده، سوروجو باخيشي اوزلرده دولانير. كميسه‌دن جاواب آلمادان بیر نقطه‌ده دونوب، دايانير. زامانين سورعتله كئچمه‌سيني هامي دويوردو؛ هامي فيكيره داليب دوشونوردو: “نئيله‌مه‌لي‌ديلر، بو شوقريبي هارادا ايتير- باتير ائتمه‌لي‌ديلر؟”.
اونلاردان كيميسي آياغا دوروب، هاميني بير طرفه چكیلمه‌يه چاغيرير. سیمئنت دؤشه‌مه‌يه سالینیب، ايللر بويو سو اوزو گؤرمه‌میش قارامتيل کیلیمی قووزاییب، قاتلاییر. کؤینه‌یی سلیماندان آلیب، یئره سریر؛ صافلاییب، شوماتلاییر. کیلیمین یئرینه قایتاریلماسی‌لا برابر کؤکس‌لر قالخیب، ائنیر؛ نفس‌لر آچیلیر. بعضا دوداقلارادا گولوش قونور….
سحر ائركن قاپي لاپدان آچيلير. فئرباش كيشي‌دي. سئللولداكي‌لاري بير به بير گؤزدن کئچيرير. سونرا سوروشور: «هاني او قارا کؤینک؟» هيچ كيم دانيشمايير. فئر باش کیشی “سوروشدوم، هاني او قارا کؤینک آدام؟”- دئيه، باغيریر. يئنه‌ده جاواب چيخمايير. فئرباش كيشي‌نين ديش‌لري آغارير،- “بس، دانیشماق ايسته‌ميرسیز؟ دئمه‌لي ال بير اولوبسوز؟ سيزين قارينيز ايشله‌میر، یوخسا بئيينيز؟!”- دئيه، قینشایا- قینشا قاپينی چكيب، گئدير.
چوخ چكمير یئنی‌دن قاییدیر، دوكتور و باشقا بيريسي ايله. دوکتور سئللولا گيرجك “فئرینج‌لريزي سالين باشيزا، چیخین ائشیگه؛ یاللاه!”- دئيه، باغيرير. هامینی ائشیگه چیخاریب، كوريدوردا اوزو ديوارا دايانديريرلار. آختاريش باشلانير. نئچه دقيقه‌ده سئللول آلت- اوست اولور؛ يئني‌دن اونلاري ايچري قايتاريرلار. دوكتور بیر الي بئلينده اورتادا دايانميش، كؤينه‌یي قالديرير: “بو کؤینه‌یین یئیه‌سین ايستیرم، گلسين قاباغا!»- دئییر. يئريندن ترپه‌نن اولمايير. دوکتور بیر نئچه آن هيچ نه دئمه‌دن يوخوسوزلوقدان قانلانمیش گؤزلريني قیييب، اونلاری نظردن كئچیرير. سوكوته دالميش فضادا اونون ديشلرينين قیجيرتي سسي ائشيديليردي. او يئني‌دن ديله گلير، توختاق لحن ايله دانيشماغا چاليشاراق “بو آخير دفه‌دير سوروشورام، بو کؤینه‌یین یئیه‌سی كيمدير؟”- دئيه، هده‌له‌يير. كيمسه‌دن سس چیخمايير. دوكتور عصبي گولوش‌ايله اؤزوندن چیخماسيني گيزلتمه‌يه چاليشير. “قوردلا چووالا گيرمك ايسته‌یيرسيز؟ اولسون، آخيري خوشدور. آنجاق منيم ده اؤزومه گؤره تخصوصوم وار. من آنادان اولما لال‌لارين ديلينی آچارام”- دئیه، فئرباش كيشي‌يه خطاباً باغيرير: “بيربه‌بير بو جاكش‌لري قولاقلاييب، گيتره‌جكسن اوسته، من دری- بوغاز ائله‌رم بو اوورش‌لري، دري- بوغاز!»
بيرينجي آدامين گؤزلري قارا دسمال ايله باغلانير. آپاريب-گتیريلمه‌سي بير ساعات چكير. اونو اؤلومجول حالدا قايتاريب، سئللولا ساليرلار. ايكنيجي آدامي چاغيراندا سليمان یئریندن قالخماق ايسته‌يير، آمما يانينداكي آدامين تحكکومله اونون ديزيندن باسيب، ترپنمه‌مه‌يه چاغيرماسي اونا ايمكان وئرمیر. ايكينجي آدامي دا آپاريرلار.
سئللولدا هامي ايشكنجه اولونموش آدامي دؤوره‌له‌ييب، اونون دردیندن پاي اومدوغو حالدا تكجه سليمان ديزلرينی قوجاقلاييب، آغير گوناه حيسي ايله قيراقدا قاليب، دوشونوردو. اونو او حالدا گؤرن يولداشي قاييديب، يئني‌دن يانيندا اوتورور؛ گوله- گوله دئيير:
-نه دي، نیيه توما گئديبسن، اولمويا كؤتك‌دن قورخورسان؟
-نیيه قويمادین من اؤزوم گئده‌م هامي‌نين جاني قورتارا؟
-نوبت سنه چاتاندا گئده‌رسن، تلسمه!
– منيم گوناهيمين آغاجين باشقاسي نیيه یئسين؟
– بوردا گوناه- ثاواپ دان سؤز گتمير، بورا دؤيوش ميداني‌دير. بونلار بيزيم بيرليگيمیزی پوزماق ايسته‌ييرلر. ايسته‌ييرلر بيریمیز دئيه‌ك كيمدي او قارا كؤينك. اوندا توي- بايرام ائله‌ييب دئيه‌لر، باخ! بودور سيزين يولداشلارين قئيرتي. سيزلر بئله‌سيز. بس، بئجاها بئل باغلامايين بير- بيريزه. نقشه‌لری بئله‌دیر سليمان، آييق اول چاشماياسان
سليمان هئچ نه دئمه‌يير، آمما دردي بير ایديسه، ایندی ايكي اولور: «بس بئله! بس بيري داوام گيتره بيلمه‌ییب دانيشسا، او بو جمع ايچينده بی‌قئيرت تانيناجاق، باشي آشاغي اولوب عذاب چكه‌جك، هاميني بير-بيرينه بدبين ائده‌جك؟ … بس بئله ايمش.”
ايكینجي آدامي‌دا قايتاريرلار. آياق‌لار تيلیت قان. ذوداق‌لار شيشيب، پارتلاق- پارتلاق اولموش، گؤزلرين آلتي قارالميش و…
فئرباش كيشي اوچونجو شيكاريني سئچمه‌یه گؤز گزديرير، بيريسينی قاباغا چاغيرير، گؤزلرين باغلاماق ایسته‌ینده، سلیمان یئریندن قالخیر،: “بوراخ اونو! منم کؤینه‌یین یئیه‌سی- دئيه، قاباغا گئدير. هامي حئيران-حئيران صحنه‌ني سوزور؛ تكجه فئرباش كيشي،: “هه هه، آخي قرار ايدي دانيشماياسيز، بس نئجه اولدو؟- دئيه، قينشايير. سليمان دئيير: “گؤردون كي، دانيشماديلار، آنجاق من أوزوم ايسته‌مه‌ديم اونلار منيم اودوما يانالار.” فئرباش كيشي آغير بير شيلله‌ايله سليماني قارشيلايير، آمما سليمانين غضبلي باخشيندان چكينیرميش كيمي درحال دسمالین چیخاریب گؤزلرينی باغلايير.
*   *   *
او گوندن اعتباراً دوققوز گون تامام سليمان كؤتك آلتيندا ايدي. جور به جور ايشكنجه‌لره معروض قالميشدي . چئشیدلی سيناق‌لاردان چيخاريلميشدي. بو دوققوز گونده سليمان اولموشدو بير دري، بير سوموك. حتا او دانيشماق ايسته‌سه‌يدي ده، داها دانيشماغا ديلي قالماميشدي. اصلينه باخاندا دانیشماغا بير سؤزو‌‌ده يوخ‌ایدی. بو جان سیخیجی دورومون مثبت بیر جهتي واردي‌سا، ائله اودا بوراسيندايدي:
يوكو يونگول‌ايدي سليمانين. او تكجه بير جبهه‌ده دؤيوشوردو، ائشيك جبهه‌سينده. اونو ايچه‌ريسینده نئیلیم- نئجه ائله‌ييم دردي دئشميردي. جیسماً عذاب‌ چکیردیسه، روحاٌ توختاق‌ايدي. اونا گؤره كي بو وضعيته سون قويماغين مسئوليتیني او داشيميردي. او دئييلدي كي سؤزلرين ديله گتیرمک‌ايله اؤزونو قورتارا بيله. بوراسي ياخشي‌ايدي، آمما او تايدان‌دا ياخاسين بوراخميرديلار.
ايلك گونلر، «قوي دانيشماسين او اوورش، بو گه‌ده‌دن بوتون سؤزلري چكيب چيخارداجام»- یانیلماسی ايله، دوكتور اؤزونه چوخلو اومودلر بسله‌ميشدي. اوزون- اوزادي سورغو- سووالا معروض قالان سليمان‌ايسه اوولجه هويوخوب، سونرا گيجلميشدي. «بونلار نه‌دن دانيشیرلار؟» – دئیه، اؤزونه سووال وئريردي. آمما گئتديكجه اونون اؤزوده او آدامي، تانيماغا ماراقلانيردي: «كيم دير بو، نه ته‌هر آدام‌دير گؤره‌سن، بو اويونلاري كي منيم باشيما گتیریرلر، گؤر اونون اؤزونه نئيليرلر،…؟» او اؤز سوواللارينا جاواب تاپا بيلمه‌ييردي. اونا وئريلن سوواللاردان معلوم اولوردو كي اونو او آدام ايله ياخين بير موناسيبتده سانيرلار. يقين ائله‌ييبلر كي بونلار، ایکیسی بير گروپدا ايشله‌ييرميشلر. دوكتور ايسته‌ييردي كي شاللاق گوجونه هر شئيي ايچ ائله‌سين، آمما بالا-بالا سانكي اونون دا اوره‌یینه دامميشدي كي بير شئيي اله گتيره بيلمه‌یه‌جك.
دوققوزنجو گون، آغير بير ايشكنجه‌دن سونرا گليب سليمانين باشينين اوستونده اوتوران دوكتور بير سيگار يانديريب، اونون الينه وئرير: “گه‌ده سن نه قده‌ر كؤتك يئيه‌جكسن؟ ايت جانی وار سنده مگر، دانيش اؤزوو قورتار! عينادين دا بير حددي وار. دئميشم يئنه ده دئيیرم، نامردم اگر بوراخماسام سني. قيچلاريوين ياراسي توختاسين قوي گئت ايشيوه، گئت زيندگانليغوا. سني اوسته يوللاياندا واللاه من اؤزوم ده عذاب چكيرم. آخي سن منيم اوغلوم يئرينده‌سن. آمما مجبورام. آخي منيم ده بوينومدا وظيفه وار، ايش ايستيرلر مندن، يولداشين هر بير شئيي دانيشيب، سنه بير سؤز قويماييب قالا. آمما من ايسته‌ييرم سنين اؤز آغزيندان دا ائشيدم. ايكي سؤز بير اولسا داي قورتاردي. او يازيق دا سني گؤزله‌يير، ايكيزي ده باهم بوراخاجام گئده‌سيز. دوزه زاوال يوخدو، جاوان‌سيز، نادان‌سيز، بيليرم، آمما اینشاللاه بوردان گئدندن سونرا داها اونون- بونون فئلینه اويمازسيز. البته گره‌گ منه سؤز وئره‌سيز. اوغلان گل گؤروم، گل کؤمک ائله”- دئیه، گؤزتچيني چاغيرير.
ايكي نفر گلير. سليماني دبرديب، اوزو ديوارا قويولموش بير دستكلي صندلين اوستونه اوتورتدولار. دوكتور ايكي صفحه كاغاذين آراسينا بير كاربون قويوب سانجاقلايير. گيتريب قويور سليمانين قاباغينا: “من‌ده گئديرم، هئچ كيم بوردا یوخدور، اوتور توختاقلیقلا سؤزلريوي ياز قورتار!»
سلیمان یئنی‌دن سؤزلرینی یازیر. دوکتور قاییدیب ورقه‌نی آلیر؛ اوخوجاق قودوزا دؤنور.-“حققا کی زینازاده‌ایمیشسن. گه‌ده من سنه بیر قورانلیق سؤز دانیشدیم قیریغین بیری قیریق! منی ساریمیسان؟ بو یالان- یولانی نئچه یول منیم قافاما باساجاقسان؟”- دئیه، “نئچه یول، نئچه یول؟” سؤزونو تکرارلایاراق یوگورور، آرخادان سلیمانین قولاقلارینی چنگه‌له‌ییب، دبردیر. اونون صیفتینی اوچ- دؤرد دفه دالبادال دیوارا ووروب قایتاریر. قان سلیمانین بورنونون دئشیک‌لریندن فیشقیریر. دوکتور اونو دالی- دالی چکه- چکه گتیریب بیر صندلین اوستونه سالیر. سلیمانین گؤزلری قارالیر، اوچونوب هوشدان چیخیر.
بیر وئدره سویون باشینا تؤکولمه‌سی‌ایله، سلیمان سیلکه‌له‌نیر. هاچاندان- هاچانا گؤزلری گوج‌ایله آچیلیر. اونون قان- قیرمیزی گؤزلرینده هئچ بیر حیس، حتا نیفرت حیسی‌ده دویولمور. اونون اوچون سانکی دونیا سونا چاتمیشدی. دوکتور میزین آرخاسیندا دایانیب سیگار چکیردی. او سلیمانین آییلماسین گؤرجک اؤزو ایله دانیشیرمیش کیمی سلیمانا ائشیتدیریر: “منی یاندیران بوراسیدی کی قاباق یازدیقلارینین‌دا گونه بیر باش- قولاغین ویریب، قیسالدیر. معلوم دئییل گیج‌دی بو دیوس، یوخسا بیج‌دی؟ ائله‌دیر یا یوخ؟ سننه‌نم، دیللن! دی جاواب وئر منه!”- دئیه، باغیریر. سلیمانین آغیزی توتار توتماز:
–          نه‌یی یازمامیشام؟
–          چوخ شئیی. بو یول نییه گه‌ده‌نین آدین یازماییبسان؟
–          آدین؟! من اونون آدین بیلمیرم، نئجه یازیم؟
–          “نئجه؟ سن اونون آدین بیلمیرسن؟ گه‌ده اوورش، منیم اؤز اوزومه یالان دانیشیرسان؟ بیلمیردین بس نئجه یازدین؟ اولمویا یاهالیرسان؟ قان قوسدوررام سنه من. دئدیگینی دانیرسان؟” دئیه، سلیمانی وئریر شیلله‌نین آغیزینا. سلیمانین بورنونون قانی یئنی‌دن آچیلیر.
بو آن قاپی آچیلیر. باشقا بیریسی ایچری گیریر. سلیمانی دوکتورون الیندن آلیر: “بابام نه خبردی؟ چوخ عصبی‌سن دوکتور! بئله گئتسه سكته ائلرسن. خواهيش ائليرم سن بويور گئت، اجازه وئر قوي من حل ائله‌ييم؛! –دئيه، دوكتورو اوتاقدان چيخارديب، قاپيني اؤرتور. دسمال قوطوسونو گؤتوروب سليمانا ساري اوزاديب-“گؤتور، گؤتور آغيز-بورنووو تميزله!”- دئيير. سليمان دسمالدان گؤتوروب بورنونون قاباغينا توتور. كيشي ايسه قوطودان بئش- آلتي واراق دسمال چكيب، میزین اوستونده‌کی بارداغین سويو ايله ايسلادير. سليمانين يانينا گلير؛ باشلايير اونون اوز- گؤزون سيلمه‌يه. اوزده داها اوزلوك قالماميشدي. ذوداق‌لار هؤرولوب اولموشدو بيلك يوغونلوقدا. بورون شيشيب قيزارميشدي. گؤزلرين آلتي، ياناق‌لار گؤم-گؤي گؤیریب، قولاق‌لاردان ايسه، ياريشدان چیخميش خوروزون پيپيگي تك، قان- ايرين سيزيردي. كيشي سليمانين اوزون سيله-سيله، “بابام گؤر أوزوو نه گونه قويوبسان؟ اؤزوندن ساواي دوكتورو ده ده‌لي ائله‌میسن. كيشي آز قالميشدي سكته ائله‌يه. پيس آدام دئييل او، آمما متأسفانه چوخ عصبي‌دير. اؤزوندن چيخاندا بيلمز نه ائله‌يير”- دئییر. آغيزين سليمانين قولاغينا ياخينلاديب پيچيلدايير: “ايكي اوچ نفر اينديیه‌دک الي‌نين آلتيندا اؤلوب. شانس گتیردین من گلديم چیخديم؛ يوخسا آللاه بيلير نه اولاجاق‌ایدی. ياخشي، ايندي دئي گؤروم جريان نه‌دير؟
–          مني قارالاييب كي او كيشي‌نين آدين ياز، دئيير قاباق يازيبسان، ايندي نیيه يازميرسان.
–          ياخشي، ياز داي، اودا بير سؤز دور.
–          آدين بيلميرم، نئجه یازیم؟
–          بس قاباق نئجه يازميشدين؟
–          من يازماميشام، يازا بیلمزدیم.
–          بابام گوناه بو دوكتورده‌دي واللاه. از بس كي ویرير، هاميني گيجلدير. ياخشي فيكيرلش اوغلوم، يازماسايدين كي او دئمزدي. اولمويا اؤزوو ايتيريبسن؟ ال- آياغيوي نیيه داغيديرسان؟
–          بو نه سؤزدو؟! ايمكاني يوخدور من يازميش اولام. من بيلمه‌ديگيم آدي نئجه يازا بيله‌رم؟
–          قوي من باخيم گؤروم، آدين نه ايدي سنين؟
–          سليمان
«سليمان، سو، لي، مان» دئيه- دئيه پوشه‌لري آلت- اوست ائله‌يير، بيرين گؤتورور، آچيب ورقلره بير-بير باخير.
–          ياخشي، دئمه‌ديم سنه، بابام يازماسان كي دئمز. «بويور، بودا سنين اؤز خطين!”
سليمان هويوخور، ایسته‌مه‌دن یئریندن قالخیر:
–          بو اولان ايش دئييل، ايمكاني يوخدو، هاني؟ گؤسترين!
–          گؤستره‌جه‌يم، تلسمه! آمما بونو دئييم كي سنده ده بيجليك وار هاآ… بس بئجاها كؤتك يئميرسن. معلوم اولور كي ائله بئله‌سي بير آد يازميسان، سونرا ياددان چيخارديبسان، ايندي اؤزوو تولكولويه ویريب، ايسته‌ييرسن كي آدي اؤیره‌شیب، دوباره اونو يازاسان، هاآ؟ بو اولماز، يوخ، بونو دوكتور قبول ائله‌مز
سليمان داها اؤزون ساخلايا بيلمه‌ييب، سسين اوجالدير:
–          هئچ ده ائله دئييل. هر آد اولور اولسون، آنجاق منيم يازديقلاريمدا بیر آدام آدي گلسه، من حاضيرام…
–          اليني گتیر آشاغي! قابان اوغلو قابان! دوكتور بيلر، سن بيلرسن، اصلاً منه نه ربطي وار؟ هله منه الين‌ده اؤلچور قودوخ…
ائله بو آن‌دا دوكتور آدامجیل بیر قورد كيمي ايچري يوگورور: “من تانيرام بو ايت امجه‌ييندن سوت اممیش قورومساغي، تانييرام بونو من!”- باغيرتيسي ايله دوشور سليمانين جانينا. “منه عنتر اويناديرسان، قورتاررام بو اويونو من. گه‌ده گل، گل آپار بو اوورشي، بو گئجه يا منه وئرن آللاه‌دير يا بونا، گل آپار اوسته، گه‌ده گل!”
دوكتور بو سفر سانكي دوغرودان‌دا ده‌لي اولموشدور. اومودونو اوتوزموش، شكسته اوغراميش بير آدامين سون چاليم- ویريم‌ين نوماييش ائتديرن دوكتورو اونون امكداشي، قولوندان چكيب سيلكه‌له‌مك ايله اؤزونه گتیریر، و تحكکوم ايله اونو ايته‌له‌ييب ائشيگه آپارير.
یئره سريلميش سليمانين ذهني هوشلو- هوشسوزلوق سرحدينده دولاشيرديسا، او، قاپي داليندا دانيشيلان سؤزلري سئچه بيليردي:
–          بابام سن نه ائديرسن؟ اؤلدوردون گه‌ده‌ني. سؤز چكمك هنر دي بابام، زور دئييل. بو دفه‌ده بونو يوخاري يوللاسان، بيل كي اؤلوسو قاييداجاق. بابام سیشديغين پوخو هله يوماميشيق. او قده‌ر اطلاعاتي الدن وئردين، ايندي ياپيشيبسان بو بدبختين ياخاسيندان؟ بابام سؤزو يوخدو دانيشا، باشا دوش!، من ییرمی ايل‌دي بو ايشده‌يم.
–          من، آخير اونون ديلين آچارام.
–          سندن بؤيوگو ده اونون ديلين آچا بيلمز. بيلیرسن نیيه؟ چون سؤزو يوخدو. سال الدن دئديم! بو، بير دستوردو سرهنگ!

(بیرینجی بؤلومون سونو)

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

ایشیق درگیسی، سایی 1
ایشیق درگیسی، سایی 2
ایشیق درگیسی، سایی 3
ایشیق درگیسی، سایی 4