roohan (2)
بارماق ـ بارماق
روح‌انگیز پورناصح

آشاغییا ائندیکجه یونگولشیردی، بلکه ده‌هاوا کاپسولونون گئتـ گتده‌هاواسی آزالیردی.‌ اؤیردیجی اللرینی اونون کورهیینه قویوب، آستاـ آستا آشاغییا ساری یؤنلدیردی.‌ گاهدان دا باش بارماغی‌ایله، اشاره بارماغینین اوجلارینی بیرـ بیرینه یاپیشدیریب اونون گؤزونون اؤنونه توتوردو، اودا هر نه یاخشیدیر دئیه، همن ایشی گؤروب اونا جاواب وئریردی.‌ آخی دئمیشدیلر آشاغییا ائندیکجه گؤودن آغیرلاشاجاق؟ شاشقین حالدایدی.‌ بلکه ده یونگولشمم مرجانلارین ایشی؟ اؤزـ اؤزونه دوشوندو.‌ قورخو دولدو جانینا.‌ اولمایا منفیلیک، کیفیرلیییمی‌بوتؤولوکله اؤزونه آلیب، منی ده دومـ دورو ائیله‌سین؟ اوندا یانی ائشییه چیخماقدا، سودا هر نه گؤرونن کیمی، ایچریمده‌کیلرین‌هامیسینی‌هامی‌گؤره‌جک می؟ وای ده ده! اوندا هئچ نه‌یی گیزلده بیلمزدی.‌ هله نه یاخشی اری ده گلمیشدی! بیر آز اورکلندی.‌ یئنه هنده‌ورینه باخدی.‌ بالیقلاری گؤردوکده داها دا اوره‌یی ساکینلشدی.‌ اونلارین ایچی گؤرسنمیردی.‌‌هامیسی یولـ یولایدی.‌ بلکه ده بیردن یولـ یول اولسون.‌ اوندا زولاق پوران چاغیراردیلار اونو.‌ جانینا اوشوتمه گلدی.‌ هله نه یاخشی سو ایستیایدی.‌
هر نه‌دن چتین آغزینداکی‌هاوا وئریبـ آلان دستگاه‌ایدی.‌ دستگاه دا دئینده آغیز آغریییردی، الینین یاریسینا قدر اولاردی.‌ دیشلرایله ساخلامالیدی اونو.‌ سووا گیرمه‌دن اؤنجه بیر آز ایشلتمه‌یینی اؤیرنمیشدی.‌ اوندا هئچ فیکیرلشمه‌میشدی نئچه نفر بوندان اول اونو آغیزلارینا قویوب نفس آلیب وئرمیشدیلر.‌ بیر آز چیمچشدی.‌ سویون اوستونه چیخماخدا اونو آغزیندان چیخارتدی.‌ اؤزونه گلمه‌میش اؤیردیجی بیلمه‌دن اونو اوزو آشاغییا چئویریب تزه‌دن درینلییه آپارماق ایسته‌دی.‌ چؤننده سو قومپاسیله دولدو آغزینا.‌ شور سو بوغازینی آجیشدیردی.‌ یوبانمادان اییرندییی دستگاهی تزه‌دن آغزینا قویوب نفس آلیب وئرمه‌یه باشلادی.‌
زولاق بالیقلاری گؤرنده، هم سئوینمیشدی هم ده دؤیونموشدو.‌ تکجه دومویو زولاق شوشه‌دن ائشییه باخماقایدی، هردن بیر ده قاپیدان نئچه آتدیم او اله گئدیب اوغلونو گؤرمک.‌ چوخ وعده یولـ یول گئیندیرردیلر، آخی چوخ یاراشاردی، ائله تزه‌لیکده ده بیر یولـ یول کؤینک آلمیشدی.‌ اوغلونا ساری یؤنلدی.‌ تئز یئتیشسین دئیه ال آیاق چالدی.‌ اؤیردن ال ترپتمکله، اونون الیندن یاپیشماقلا اونو ساکینلشدیریب اشاره بارماغینی بیر یانا توتدو، او همن طرفه باخدی.‌ او قدر خیردا بالیغی بیر یئرده گؤرمه‌یینه اینانا بیلمیردی.‌
دوزلو سو بوغازینی یئنه یاندیریردی.‌ نفس چکمه‌یی چتین اولموشدو.‌ الینی دوز ساخلاییب او ال بو اله ترپتدی، کیمسه گؤرمه‌دی.‌ هر طرفده الینی ترپتسه‌ده هئچ جاواب آلمادی.‌ بالا ـ بالا اؤلومونو گؤزونون قاباغیندا گؤروردو، بیردن بیرینی گؤروب یاپیشیب اؤزونه ساری چکدی.‌ او باخدیقدا الینی یئنه همن جور ترپدیب، باش بارماغیلا اوستو گؤرستدی.‌ بیر آزدان سویون اوزونده‌یدی.‌
آغزیندا کی دستگاهی چیخاریب، آرا قیرمادان نفس آلیب وئردی.‌ سویون اوزونده اوزانیب گؤزلرین گؤیون ماوی درینلییینه تیکدی.‌ اولمایا اوردا دا‌هاوا آلیب وئرمه دستگاهی لازم اولسون؟!