roohan
کاشکی هئچ زامان…!
روح‌انگیز پورناصح

«خنجر، پیچاق، کَس، کوس!» دئیه‌رک جورو بارماقلارینی هیرس‌ایله نئچه دؤنه بیرـ بیرینه ایلیشدیریب، چکدیلر. قاش قاباغلی، باشلارین بو یان او یانا آتاـ آتا، هره‌سی بیر طرفه گئتدیلر.
هر اویوندا آزی دؤردـ بئش دؤنه جورو بارماقلارینی خنجر، پیچاق ائیله‌ییب، بیرـ بیرینه ایلیشدیریب، آجیق‌لی چکردیلر. بیر آز کئچمه‌دن خنجر، پیچاغین یئری ساغالاردی، گؤز آلتی بیرـ بیرلرینین اوزونه باخیب، گولومسه‌یه‌ردیلر، آستاـ آستا یاخینلاشیب، ال وئرردیلر، هر نه‌یی اونودوب، تزه‌دن باشلاردیلار اویناماغا.
خنجر، پیچاق، کسمک، کوسمک، گؤزآلتی باخماق، ال وئرمه، هر نه‌یی اونودوب، تزه‌دن باشلاماقدان سووای هئچ نه تانیمازدیلار.
ایللر سونرا، اوشاغلیق دوشونجه‌سیندن بیر یوللوک آیریلمایان زامان، بؤیوک‌لر ساواشیب، کوسنده، بو دالاشمالار نه ایچون!، دئیه گولردیلر. آخیردا، بیر گون خئیلک دانیشیق‌دان سونرا، بیری دئمیشدی، ایندی سیزین بئینیزه سؤز باتماز، نئچه ایلدن سونرا کئفیزی خبر آلارام. یئنه گولوب، هر نه‌یی منطق‌له حل ائتمک اولار دئمیشدیلر. اودا هئچ نه دئمه‌دن باشینی توولاییب، گولومسه‌میشدی.
چوخ چکمه‌دی. آی‌لار، ایللر، ایشیق سرعتی‌ایله گلیب گئتدیلر. ایللر کئچدیکجه، یاشا دولدوقجا، خنجر، پیچاق‌لاری چوخالدی، کسنده‌ده ائله درین کسدیلر، یئرلری ساغالمادی. یارا، یارا اوستونه قالاندی.
گؤزآلتی باخمالاری، ال وئرمه، هر نه‌یی اونودوب، تزه‌دن باشلامالاری، چوخ آز اولدو، چوخ آز. سونرا دا بیر یوللوک اونودولدولار.
او آدامی گؤرنده، سس‌لرینی چیخارتمادان، یان گزدیلر. بوندان اول بؤیومه‌یه تلسمه‌لری یادلارینا دوشوب، کاشکی هئچ زامان بؤیومه‌میشدیک دئدیلر.

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

ایشیق درگیسی، سایی 1
ایشیق درگیسی، سایی 2
ایشیق درگیسی، سایی 3
ایشیق درگیسی، سایی 4