roohan
سورونوردو!
روح‌انگیز پورناصح

داها کارانداشی کاغیذ اوسته راحاتلیق‌لا دولانا بیلمیردی. آوارا، سرگردان کاغیذین بو طرفیندن او طرفینه سورونوردو. یازدیغینی بیر زادا اوخشادانمیردی، داها اوره‌یینه ده یاتمیردی. یاهالیب آیری یازیچی‌نین ایسته‌دیک‌لرینی یازیردی سانکی. هاچاندان یابانچی اولموشدو بونا، بیلمیردی. گئجه گوندوز چالیشیردی اونلا یاناشماغا، حاییف! سونوج‌سوز چالیشما.
یازیلار گئت ـ گئده اوزاقلاشیردی دویغولاریندان، هردم بیرده ترسینه اولوردو. داها یازدیقلارینی اوخویا بیلمیردی، یازیلاری داریخدیریردی بونو. یقین آیری یازیچی‌نین، روحو یازدیریردی بونون کارانداشینی. یالقیزلیغینین آیاق‌داشی یاد اولموشدو بونا. اینانیلماز حالا دوشموشدو. بیلمیردی گؤزلری ترسینه ایشله‌ییردی، یوخسا کارانداشی؛ بلکه ده هر ایکیسی.
ایره‌لی گئتدیکجه وارلیق‌لارینین چوخو ترسه ایشله‌ییردی. گؤزلری کؤلگه‌لی گؤروردو. قولاق‌لاری آغیر ائشیدیردی، قیچ‌لاری سؤزونه باخمیردی، قول‌لاری بیر قاریش‌دان چوخ، یوخاری قالخمیردی. یالنیز اونا اینانا بیلمیردی.
اولمایا کی، گون اوزو گؤرمه‌یه نئچه یاد یئردن کئچمه‌یینه، نئچه جوت، یاد گؤزونون آلتیندان قورتولوب ـ قورتارماسینا گؤره بئله سورونوردو، بلکه ده گون اوزو گؤرمه‌میش، یازدیقلارینین قویلانماسیندان قورخوردو؛ آرزولارینین اوره‌یینده قالانماسینی دویوب، سورونوردو.
داها ندنی اؤنم‌سیزایدی، اؤزونون سورونمه‌سی یادینا دوشنده.
راحاتلیق‌لا کارانداشی‌ایله بیرلیک‌ده سورونوردولر.

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

ایشیق درگیسی، سایی 1
ایشیق درگیسی، سایی 2
ایشیق درگیسی، سایی 3
ایشیق درگیسی، سایی 4