kabiri
آنی‌لار توپلوسوندان
«نئچه ایل اولدو؟»
رقیه کبیری

دیل- دوداغی آراسیندا میزیلدانا- میزایلدانا تنه‌بینین بویوندا وار- گل ائدیر. اوتاغیمین آچیق قاپیسینا یئتیشینجه دؤنوب، یئنی‌دن تنه‌بینین او باشینا دوغرو یوللانیر. میزیلتی سسینی اوتوردوغوم یئردن ائشیتمیرم. بلکه آددیملارین ساییر. بلکه‌ده بیر ماهنی، اولا بیلسین حافیظ دن ازبری اولدوغو غزللری میزیلدانیر و یا شهریاردان سئودیی « گئتمه ترسا بالاسی…» شعرینی و بلکه حمید مصدق- ین شعرلریندن میزیلدانیر. 81 یاشی اولسا دا، حافظه‌سی یئرلی، یئرینده‌دی. تحصیلینه دوام ائتسه‌ایدی، بلکه ده بو اؤلکه‌نین ضیالی قادینلارینین سیراسیندایدی. دولو دوداقلاریندان، بوزارمیش ایکی تئل چوهرایی قیطان قالیب. انگی اوزانیب. یاشینا گؤره اوزونون دریسی چوخ دا بوزوشمه‌ییب. هله ده دیم- دیک آددیم آتا بیلیر. وار- گل ائتمه‌سی عاغلیمی قاریشدیریر. آز قالیرام یازدیغیم حکایه‌نی یاریمچیلیق بوراخیب، کامپیوترین باشیندان قالخیم. قفیلدن اوتاغیما بویلانیر:«گئنه تَزه ناغیل یازیسان؟»

یازدیغیم حکایه‌نی یاریمچیلیق بوراخیرام. بئله‌سی یازا بیلمرم. قاپینین آغزیندا دایانیب، جوابیمی گؤزله‌ییر. حکایه‌نین دوامینی یازماقدان واز کئچیرم. فایلی قاپادیرام.

 «ایستیرم آذر آیینا گؤره یازیم» دئییرم. فیکره دالمیش کیمی قاشلارین یوخاری چکیر: «ههههههه» دئییب یئنی‌دن تنه‌بینین او باشینا آددیملاییر. نئچه دؤنه گئت- گلدن سونرا اوتاغیما یاخینلاشاندا اوجادان دئییرم:« یادیندا؟» گئنه قاشلارین یوخاری چکیب دوداغین قاچیردیر: « داداشین قالسایدی بیر کیتاب سوز دییردی سن ده یازاردین» نه دئدییمی آنلاییب. ندنینی بیلیمرم اما 37 ایل اؤنجه دونیاسینی دییشدیی آتامی داداش سسله‌یه‌ردیک. بلکه ده آنام قیر اتک‌لی اولوب، هئچ اوغلان دوغمادیغیندان آتامی بئله سس‌لردیک. «منیم ناغیلیم قالسین سورا یازارام. ایندی سن ناغیلینی دئه، من یازیم» دئییرم. سؤزومو دوشونمه‌میش کیمی اوزومه باخیر. بو گونلر قولاغی بیراز آغیر ائشیدیر. یئریمدن قالخیب اوجا سس‌له دئییرم:«بیراز او زامانلاردان دئه من ده یازیم دااا» قاپینین چرچووه‌سینه دایانیب، فیکیره دالیر.

«نه دئییم آخی؟ قوجالمیشام هامیسی یادیمدان چیخیب»

بیلیرم او زامانلاری هئچ اونوتماییب. کئفی ساز اولاندا، مکتب ده اوخودوغو سرودلاری بئله اوخویار.

«مدرسه‌دن دئه… کیتابلاریزی یاندیرانان سورا نه اولدو؟… »

«ههههه… کیتابلاری قالاخ قالادیلارحیطین اورتاسینا ….سورا یاندیردیلار…»

اوتاغیمین دیوارینداکی تابلویا زیلله‌نیر. ایکی کیشی بیری آیاقدا، او بیریسی آخار بیر چایین قیراغیندا  قار اوستونده ایله‌شیب. کیشی‌لرین قول- قیچ‌لاری بدنلرینه گؤره اوزون دی. سیر- صفت‌لری بیربیریندن سئچیلمیر. اکیزدیلر دئیه‌سن. آیاقدا دوران کیشی قار توپاسینین آلتیندان بیتمیش بیر چیچه‌یه باخیر. منسه آنامین باخیشینین ایزینی توتوب، تابلویا باخیرام.

«سورا فرقه داغیلدی. چوخلاری کندلره قاشدی. بیرازیندا توتدولار…» گؤزونو تابلودان آییرمادان سؤزونو دوام ائدیر:« سور دا منی اره وئردیلر» دئییب، دوداغین قاچیردیر. منسه گؤزوم اونون آغزیندا، سؤزونون دوامینی گؤزله‌ییرم.« بوسؤزلردن بیر شئی چیخماز. سن اؤز ناغیلینی یاز» دئییب،  تنه‌بینین او باشینا گئدیر. منسه ال- قولوم یازماقدان سوستالیب، اونا باخیرام. یئنی‌دن اوتاغیمین قاپیسینا یئتیشنده « گؤره‌سن گئنه ده بوردا فرقه ‌قالیر؟» دئییب، دویوارداکی تابلویا باخیر.

آنامین ندن دانیشمادیغینی دوشونورم. امنیت حیسی باخیشیندا زیل چالیر.

92.9.20

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

ایشیق درگیسی، سایی 1
ایشیق درگیسی، سایی 2
ایشیق درگیسی، سایی 3
ایشیق درگیسی، سایی 4