ایشیق 1
آذربایجان معلم‌لری و تحصیل مساله‌سی
ایشیق 2

آذربایجان قفه‌خانالاری

ایشیق 3

آذربایجان و مهاجرت مساله‌سی

ایشیق 4
آذربایجان توی‌لاری

majdfarr
دوغرو خیال
مرتضی مجدفر

نئچه آی اولاردی کی آتامین قبیری اوستونه گئتمه‌میشدیم. او گون جمعه آخشامی آنام، باجیم و باجیمین اَری ایله بهشت زهرایا گئدیب، آتاملا گؤروشموشدولر. او گون، اونلارین قبیر اوستونه گئتدیکلرینی ائشیتدیکدن سونرا، اؤزومدن، هم‌ده آتامدان اوتانیردیم. دئمک ائله ایشلر و روزگار منی یاخالامیشدی کی اؤزومو ده یاددان چیخارتمیشدیم.

جمعه گئجه‌سی، بو فیکیرلرله یوخویا گئتدیم. دئییرلر یوخو گون عرضینده کئچمیش حادثه‌لرین و دویغولارین قاییتماسی‌دیر. بلکه ده بئله اولسون.

او گئجه آتامی یوخودا گؤردوم. چوخ گنج‌لشمیشدی و قیافه‌سی، اونو منه، بیرینجی کیلاسا گئدن واختلارین یاشیندا گؤستریردی. بیر آغ شالوار- کؤینک گئیمیشدی و قارا قاییشی دا بوَ آغ پالتارین اورتاسیندا چوخ گؤزه چارپیردی. اوَزاقدان منله گؤروشدو و منی سلاملادی. الیمی الینه طرف اوزاداندا، دالی- دالی گئتدی و دئدی:«منله ال وئره بیلمه‌سن…» بئله دوشوندوم کی مندن گیلئیلی‌دیر. آنجاق سؤزونه داوام وئردی و گوله-گوله دئدی:«داها سیزکی بو گونلرین اوشاغی‌سیز و فیلیم‌لرده گؤروموسونوز اؤلولرین روحلاری ال وئره بیلمزلر. اونلارین اللرینه یا بدنلری‌نین هر بیر حیصه‌سینه ال ووَرسانیز، الینیز بوشا گئده‌جکدیر…»

داها بورادا آتامین اؤلمه‌سینی بیلیرم و اونون روحونون یوخوما گلمه‌سینی آنلاییرام. گئدیب بیر داش اوستونده اوتورور. دئییرم: «نییه بس داشا گیرمیرسینیز؟»

دئییر:«داها قرار اولمادی هرنه‌یه قیپ قویاسان. نه خبر؟» و یئنه‌ده گولور.

دئییرم:«دولانیرام. کئچینیرم. ایشله‌ییرم. ساغ‌‌اولون.»

دئییر:«کئچینمیسن، اؤزونو یورورسان. ایشله‌میرسن، ائشینیرسن! بیر بئله اؤزونو یورما، بیرآز دا اؤزونه قاییت!»

دئییرم: «سیزه ساری باشیم آشاغی دیر. باغیشلایین. گلنمه‌میشم بو نئچه واختدا. دونن‌ ده هامی گلدی. من گلنمه‌دیم.»

دئییر: «منه ربطی یوخدور. اورادا قویلادیغینیز منیم اؤلومدن ده فیکر ائدیرم هئچ‌‌نه قالماییبدیر. منی یادا سالسانیز، هامیدان چوخ اؤنملی‌دیر.»

بیر داها عذر دیله‌ییرم. دئییر:«عیبی یوخدور. گؤردون کی، سن گلمه‌دین، من گلدیم.»

دئییرلر جوربه‌جور دانیشیقلار و نئچه- نئچه بؤلوم و صحنه‌لری اولان بیر یوخو، یوخو گؤره‌نین باخیمیندان اوزون ساییلیرسادا، تکجه نئجه ثانیه‌دن عبارتدیر. دئمک اَن اوزون یوخولار، 15-20 ثانیه‌دن، آرتیق دگیلدیر. بو علمی سؤزلره قولاق وئرمه‌یه‌رک، منیم او گئجه‌ کی یوَخوم، نئچه- نئچه ساعات اوزونا چکدی و آتامین روحو، حیاتدا اولان و هر بیر زاددان خبری اولان بیر کیمسه کیمی، منی سورغویا چکه‌رک، گؤستریش‌لر وئردی. بیر چوخ سؤزلری یادیمدان چیخسا دا، ساغ اوللاشما سؤزلری یادیمدان چیخان دگیل.

 آتام اوتوران داشین هنده-‌ وری گول- چیچکلی بیر یئر ایدی. ایکیمیزده جمعه گئجه‌سینده بیر- بیریمیزله دانیشدیغیمیزدان خبریمیز وار ایدی. هم ده اونون اؤلمه‌سینی و منیم حیاتدا اولدوغومو بیلیردیک. گئجه‌نی دویدوغوما باخمایاراق، هر بیر یئر ایشیقلیق ایدی. دئمک: گوندوز ایسه گئجه.

آتام گؤیه باخدی و بیردن بیره منه دئدی:« هم منیم گئتمک واختیم دیر، هم‌ ده سنین صبح نامازی‌نین واختی گئجیکمکده‌دیر. بیر آز دا دایانسان، گون چیخار!» سونرا یئنه گؤیه باخدی و دئدی: «چاشما! بوراسی بیزیم عالمیمیزدیر، هر شئی عکسینه دیر. ایندی بیز ایشیقداییق، سیز ایسه قارانلیقدا. آنجاق بیر آز سونرا، قارانلیقلا ایشیغین یئری دگیشیله‌جکدیر. بو دگیشیلمه،زمانه‌نین ایشی دیر.»

آتامدان منی صبح نامازینا دوغرو چاغیردیغینا گؤره، راضی‌لیغیمی بیلدیردیم و ناماز قیلماغا ساری آیاغا دوردوم.

آتام دئدی:« یاواش! هئچ‌واخت یاتاغیندان بیر دفعه‌لیک آیاغا قالخما. اؤنجه دور، بیرآز اوتور، سونرا آیاغا دور. آنجاق بو گون بیر نئچه گؤز قیرپیمینجا دا آرتیقراق یاتاغیندا قالمالیسان!»

دئدیم: «نییه بس؟!»

دئدی:«سن یئریندن دوروب، یاتاغیندا اوتوروب، اؤزونو تاپینجا، من بورادان کئچیب، گئدیب، اؤزومو بو اوتاغین ائشیگینه چاتدیریب، آپارتمانین قاپی‌سیندان چیخیب گئده‌رم. سن عجله‌ایله آیاغا قالخیب، اؤزونو اوتاغین ائشیگینه چاتدیرسان، بیردن منی ائودن چیخاندا، هالدا گؤروب، قورخارسان. من کی بالامی قورخوتماغا گلمه‌میشم!»

ائله بو سؤزو ائشیدن کیمی، یوخودان اویاندیم. عادت اوزره بیردن یئریمدن دورماق فیکرینده ایدیم. آنجاق آتامین سؤزو یادیما دوشدو. یئریمین ایچینده اوتوردوم. دئمک بورادا یازدیغیم سؤزلر،بیر- ایکی ثانیه‌نین ایچینده و آتام دئمیشکن بیر گؤز قیرپیمیندا کئچدی. بئله دوشونوردوم کی ائله ایندی قاپی‌نین ایشگیل‌لنمه سسی گله‌جکدیر. سونرا اؤز- اؤزومله اونون راحاتجاسینا قاپیدان کئچمه‌سی یادیما دوشوب، قاپی سسینی اونو‌دوردوم. هم ده قورخا-‌قورخا، اوره‌گیمده «تئز اول! چیخ هالا، بیرداها آتانی یوخودا یوخ، اویاقلیقدا گؤر» باشلیقلی دانیشیق جینگیلده‌ییردی. بونلارین هامیسی، دئدیگیم کیمی آرتیق بیر- ایکی ثانیه چکمه‌دی.

ترلمیشدیم. گون چیخانا چوخ آز واخت قالیردی. ائله اوتوردوغوم یئرده یاپیشیب، تخت اؤستونده قالمیشدیم. آرتیق، آیاغا قالخدیم. یاتدیغیم اوتاقدان هالا طرف یؤنلدیم. باغلی قاپینی آچدیم و اؤره‌گیم آتا گؤروشو سئوگیسیندن دولو اولاراق، قورخا- قورخا اوتاغین چرچیوه‌سیندن ائشیگه ساری بویلاندیم. آتامدان هئچ بیر ایز یوخ‌ایدی و قورخوملا سئوگیم، هر ایکیسی‌ده سبب‌سیز ایدی. گون چیخماقدا ایدی. ناماز قیلمالی ایدیم.

یک پاسخ

  1. آه … قارداش بو نه دی؛ بومبادی ؟ منی شهید آتامی یادیما سالدی ؛ آخی اونون یارالاری تورپاقلار اوسته چیچگ آچمیشدی منی یامان داریخدیردی – گؤزلریمی آپاردی سئل گیله … آه ه ه ه ه …
    آه… قوشلار داریخدی بئله
    یارا – یارا آخدی بئله
    آخدی بئله – باخدی بئله
    شؤون دوشدو نرگیز گیله …
    گؤز یاشلاریملا اؤپورم سنی قارداش .

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *