معاصر دونیادا، سلبریتیزم فئنومئنی مرکب و چوخ شاخه‌لی بیر مسئله اولا‌راق اینکیشاف ائتمکده‌دیر. جمعیتین اجتماعی و تئخنولوژی ده‌ییشیک‌لیک‌لریندن تأثیرلنه‌رک، بو فئنومئن مدنی و اجتماعی ساحه‌لرده داها چوخ گؤرونمکده‌دیر. بیر طرفدن، تئخنولوژی اینکیشاف‌لار و اجتماعی شبکه‌لرین یارانماسی، (مثلا: اینستاگرام، توییتر، فیسبوک، تلگرام، واتساپ و سایر پلاتفورما‌لار) بو فئنومئنین یارانماسیندا و یاییلماسیندا چوخ اؤنملی رول اوینامیشدیر؛ دیگر طرفدن ایسه، اجتماعی ده‌ییشیک‌لیک‌لر بو فئنومئنین اینکیشافیندا تاثیرسیز قالمامیشدیر. نتیجه اعتباریله، اجتماعی شبکه‌لر و ده‌ییشیک‌لیک‌لر یئنی شؤهرت و سلبریتیزم فورما‌لارینی یاراتمیش، فردی‌لییه و اؤزونو ایفاده ائتمه‌یه اولان ماراق داها دا آرتمیش، اینسان‌لار حیات طرزلرینی، خاریجی گؤرونوشلرینی و گونده‌لیک فعالیت‌لرینی آچیق شکیلده تقدیم ائتمه‌یه داها چوخ مئیل ائتمیش و بو ده‌ییشیک‌لیک‌لر نتیجه‌سینده مدنی ده‌یرلر کئچیجی شؤهرت قارشیسیندا کؤلگه‌ده قالمیشدیر.
سون ایللرده ادبیاتیمیزدا باش قالدیران و گونو-گوندن ده گئنیشلنمکده اولان «ادبی سلبریتیزم» فئنومئنی دقته لاییق بیر مسئله حالینا گلیب چیخیبدیر. بو فئنومئن بدیعی و ادبی اثرلرین کئیفیتیندن و ائستئتیک گوجوندن داها چوخ، شؤهرت و اجتماعی شبکه‌لرده‌کی پوپولیارلیغا اساسلانان موضوعلاری میدانا آتیبدیر. باشقا بیر سؤزله، «ادبی سلبریتیزم» ائله بیر حادثه‌یه چئوریلمکده‌دیر کی، بورادا بیر سیرا یازیچی، شاعرلر و ادبیات ایشچیلری کیمی اؤزلرینی تقدیم ائدن اینسان‌لار، اثرلری‌نین کئیفیتی و درین‌لیگی ایله دئییل، اجتماعی شبکه‌لرده قازاندیق‌لاری شؤهرت و جلب ائدیجی‌لیک سایه‌سینده مشهورلاشیر و ادبی مرجع‌لره چئوریلیرلر. بو پروسئسده بدیعی و ادبی معیارلار گئت- گئده اؤز یئرینی اجتماعی شبکه‌لرده ایزله‌ییجی سایی، به‌ینمه(لایک) اعتباری و گوندمده قالما باجاریغی کیمی گؤستریجی‌لره وئریر.
بو مسئله‌یه دقت ائتمک اونا گؤره اهمیتلی‌دیر کی، «ادبی سلبریتیزم» یالنیز حقیقی ادبی معیارلارینی سوال آلتینا آلماقلا کیفایتلنمیر، هم ده مدنی کیم‌لییینی هله ده فورما‌لاشدیرماقدا اولان بیر جمعیتده بیر سیرا منفی نتیجه‌لر ده دوغورا بیلیر. بئله کی بو فئنومئن، ادبی اثرلرین کئیفیتی‌نین آشاغی دوشمه‌سینه، سطحی‌لییین یاییلماسینا، ادبی تنقیدین ضعیفلنمه‌سینه، مدنی مصرفچیلییین آرتماسینا، استعدادلی قلم صاحیبلرینین کؤلگه‌ده قالماسینا و داها چوخ شوو کاراکتئرلی اثرلرین تبلیغ اولونماسینا و مطالعه‌نین، ادبی تدقیقین آزالماسینا مساعد شراییط یارادیر. بوتون بونلار میللی مدنیت کیم‌لییینه، ائله‌جه‌ده ادبی یارادیجیلیغین گله‌جه‌یینه اوزون مدتلی منفی تاثیرلر قویا بیلر. تاسف دوغوران اودور کی، بو پروسئس تکجه پوپولیار ادبیات ایشچی‌لریله محدودلاشمیر و سون واقتلار بعضی حقیقی ادبیات نوماینده‌لرینی ده سلبریتیزم داورانیشلارینا مئیل گؤسترمه‌یه یؤنلتمکده‌دیر…
قارشیدا دوران دوشوندوروجو سوآل بودور: ادبیاتیمیزدا «سلبریتیزم» فئنومئنی فرصت‌می، یوخسا تهدید!؟
خرداد ۱۴۰۴
