سئویملی شاعریمیز اوستاد حبیب فرشبافا اتحاف
باخیشین ماوی‌دیر،
گؤزلرین دنیز؛
دنیز ماوی‌لیک‌له دوغولوب ائکیز.
بعضا دالغالانیر باخیشیندا غم،
بعضا ده گؤرورم
سئوینج لپه‌له‌نیر دنیز گؤزوندن؛
غمین ده ماوی‌دیر
سئوینجلرین ده.
دالیرام گؤزونون ماویلییینه؛
ماوی باخیشین‌لا اوچورام یئنه-
ماوی دیلک‌لرین گؤی قورشاغینا؛
اوردا گونشله‌نن آرزولارینی
تاپیرام گئجه‌نین آغ سحرینده؛
آرزوندا ماوی‌دیر، اومیدلرین ده.
ماوی باخیشین‌لا قوشالاشاندا
سئویرم دالغانی، سئویرم غمی.
دنیز گؤزلرینله قوجاقلاشاندا
سوزورم سئوینجله بوتون عالمی.
اردیبهشت ۱۳۷۰
