«سرخوش اولون» دئیه شعر دونیاسینی آلت اوست ائدن فرانسه‌نین داهی شاعیری، شارل بودلئرین ساوچی توتومدا بیر سؤزو وار! او، «آما نه ایله؟» سوروشاراق، «شرابلا، شعرله یا دا اَردم‌له» جاواب وئرسه ده، یئنه اؤز جاوابینی یئته‌نک‌سیز بیلیر؛ و «نئجه ایسترسه‌نیز» دئیه آچیق بیر یول یولچولوغویلا «آمما سرخوش اولون» دئییر سونوندا! بونونلا دا «شعر» یوخسا بوتونلوکده «ادبیات» ایله سرخوش اولماقدان سؤز ائتمه‌سی لاپ ماراقلیدیر.
زامان دونیانین کؤتو اوزونو ثانیه‌لری ایله بیرر-بیرر آجی چکدیرَرک اؤنوموزه سرگیله‌میش‌دیرسه، گؤزللیکلر آرایان روحلارا زامانین قاپساملی جایناغیندان چیخیش یولو واردیر هر حالدا. البته آنادیلیمیزده ادبیات دادینی بیزلره دادیزدیران اینسانلار ساغ اولسون؛ اونلارین بیزه گؤستره‌بیله‌جک، شارل بودلئر اؤنردییی سرخوشلوق، بیر آن بئله اولسون دا بیزی اولدوغوموز سوییه‌دن گؤتوروب هر شئیی اونوتدورا دا بیلر.
سایین حسین واحدی‌نین آلتی ایله یاخین یورولماق بیلمه‌ین امه‌یی ایله ییغیلمیش، ایچینده یاشادیغیمیز دونیانی چئشیتلی آچیلاردان رنگ‌به‌رنگ آنلاتیلارلا قاباغیمزا قویان «بیزیم حکایه‌لر» الینیزده‌دیر. آنتولوژینی نئچه یؤندن دیرله‌ندیرمک اولار؛ آنلاتی فورمو، دیل قوللانیمی، آنادیلیمیزده ایفاده اولونان تصویرلر، باخیش آچیلاری، دوزیازی و نثر کیفیتی کیمی آراشدیرمالارا دیرلی وئری‌لر بوراخاجاقدیر. بیر بئله ایشین باشلانغیجی بونلارین توپلاییب بیر یئره ییغماسی ایله باشلاناجاق.
البته کی حکایه‌لرین دیلی و نثری تورکجه‌میزین اؤرنه‌یی کیمی اولاراق گؤرونمه‌یه‌جکدیر. تورکجه‌میزین درسینی آلمایان خالقیمیز، یازارلارینین چیگینلرینده ایکی یؤنلو بورجو وار: بیر یاندان خالق دیلینده و خالقینا آنلاشیلان طرزده یازماق گؤرو؛ باشقا یاندان ایسه خالق تحصیلینی آنادیلینده آلمایان کوتله‌نین آغزیندا اگمن دیلین آخیشی دولاییسی ایله دولاشان عیبه‌جر دیلی تمیزله‌مک. هر حالدا بئله بیر قونوما گلیب چاتماق دا اوقدر آسان دئییل‌دیر؛ جسارتلی آددیملار لازیم! اصلینده نئچه نفرلیک بیر گروهون یاردیمی ایله اولابیلن ایشی حورمت‌لی واحدی جنابلاری تک باشینا گؤرموش و اوسته اشاره ائله‌دیگیم دیالکتیک آلیش وئریشین اؤنملی قیسملریندن اولان آددیملاری گؤتورمه‌یه باشارمیش. سانیرام گل گله یوللار آچیلیر گنج جسارتلی یازارلاریمیزا.
سؤزو اوزاتمادان ایلک باخیشدا بوتون وارساییملاری بوش وئررک المیزده‌کی آنتولوژی‌دن آلابیله‌جه‌ییمیز لذتی داها شیدتلی دادماق اوچون شارل بودلئرین «سرخوش اولون» شعری ایله باشلایاراق، ایلک اوخونوشدا یالنیزجا سرخوش اولماق ایسته‌یی ایله حکایه‌لرین اوخوماغینا دعوت ائدیرم.
«تام سرخوش اولمالی. هر شئی بوندا؛ تک سورون بو. چیگینلرینیزی ازن، سیزی تورپاغا دوغرو چکن زامانین قورخونج آغیرلیغینی دویماماق ایچین دورمامازجاسینا سرخوش اولمالیسینیز.
آما نه ایله؟ …
شرابلا، شعرله یا دا اَردم‌له، نئجه ایسترسه‌نیز.
آما سرخوش اولون…
و بعضی بعضی، بیر سارایین پیلله‌لری، بیر آرخین یاشیل اوتلاری اوستونده، اوتاغینیزین دونوق یالنیزلیغی ایچینده، سرخوشلوغونوز آزالمیش یا دا بوس‌بوتون کئچمیش بیر دورومدا اویانیرسانیز، سورون؛ یئله، دالغایا، اولدوزا، قوشا، ساعته سورون؛ هر قاچان شئی‌یه، اینله‌ین، یووارلانان، اونله‌ین، دانیشان هر شئی‌یه سورون؛ «ساعت نئچه» دئیین. یئل، دالغا، اولدوز، قوش، ساعت همن وئره‌جک‌دیر یانیتی سیزه: «سرخوش اولما ساعتی‌دیر!». زامانین اینیم-اینیم اینله‌تیلن کؤله‌لری اولماماق ایچین سرخوش اولون دورمامازجاسینا!… شرابلا، شعرله یا دا اردم‌له، نئجه ایسترسه‌نیز…»*
*پاریس سیخینتیسی: بودلئر/ چئویری: تحسین یوجل
