چئویرن: ایشیق
ترجمه: ایشیق
ایشیق

منصوره ننه‌نین حسرت بایاتیسی
محبت فروغی(پارلاق)

سَککیز ایل بوندان اوَل؛ «منصوره تمهیدی» آذربایجانین موباریز و دؤزوملو قادینلاریندان بیری حیاتین دَییشدی. منصوره نمین بؤلگه‌سینین «حور» کندینده دونیایه گَلمیش و ایکینجی بین‌الخالق محاربه‌سینده ایللر بویو اؤز حیات یولداشینان بیرلیکده ایشغالچی قوه‌لر قاباغیندا موباریزه‌یه ال آتمیش و نهایت ده اوز وطنیندن سورگون اولموشدور. او وطن یولوندا چوخ مصیبتلر چکمه‌سینه رغما هئچ واقت یورولمامیشدی.
او کئچیرتدیگی قارا گونلریندن بئله دانیشیردی:
«دوشمان حیات یولداشیمی اردبیلده دوستاغا سالمیش و منی اونون گؤروشوندن محروم ائتمیشدی. بؤیوک قیزیم «لاله» آغیر مریض‌چیلیگه دوچار اولموشدو. اجنبی دوشمان اونو کنددن چیخاردیب، اردبیل شهرینده حکیمه آپارماغا قویموردو. گئجه‌نین قارانلیغیندا لاله‌م جان وئریردی، آما منیم آغلاماغا؛ قونشولاری بئله چاغیرماغا حتی چیراق یاندیریب، ایشیغیندا اَیلشمگه بئله حقیم یوخ ایدی. بو حالدا قیزیم لاله‌ جان وِئردی و قارانلیقدا دوشمان سربازلاری مشاییعتینده کند قبرستانلیغین آشاغی باشیندا بیر چالا قازیب، لاله‌می غسل‌سیز؛ کفن‌سیز باسدیردیم. اوندان سونرا سورگونه سورولدوم و ایللر بویو وطنیمدن دیدیرگین‌ دوشدوم؛ قاییدیب گلنده نه قدر آختاردیم لاله‌مین نم-نیشانسیز قالان مزارینی تاپام؛ تاپا بیلمه‌دیم. بو حسرت ابدی‌لیک اوره‌گیمده قالدی.»
اوندا گؤردوم منصوره ننه‌نین دوداقلاری تیتررکن ؛«حورا چشمه» گوزه‌سی‌نین آخار سویی تک گؤزلرینین یاشی یاناقلاریندان تؤکولرکن اوره‌گیندن گلن ایستی نفسلی یانیقلی سسی‌له بئله اوخوماغا باشلادی:
«ساوالان لالاسیز اولماز
یوللاری چالاسیز اولماز
بو یولا قیـــــــچ قویانین
باشی بلاسیـــــز اولماز»

چاپ

یک پاسخ

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

منصوره ننه‌نین حسرت بایاتیسی/ محبت فروغی(پارلاق)

ایشیق
www.ishiq.net

آذربایجان ادبیات و اینجه‌صنعت سایتی

منصوره ننه‌نین حسرت بایاتیسی/ محبت فروغی(پارلاق)

ایشیق
www.ishiq.net

آذربایجان ادبیات و اینجه‌صنعت سایتی

منصوره ننه‌نین حسرت بایاتیسی/ محبت فروغی(پارلاق)

ایشیق
www.ishiq.net

آذربایجان ادبیات و اینجه‌صنعت سایتی