«ادبیات سئونلر گروهو»نون یایدیغی خبره گؤره، چوخ تاسفله آذربایجان ادبیات خادیمی و «نباتی ادبی انجومنی»نین قوروجولاریندان اولان «عباس قنبری»، بیر مدت خستهلیکدن سونرا، بوگون (دی آیینین ۱۳-جی گونو) حیاتلا ابدیلیک وداعلاشمیشدیر.
1332-جی ایل قاراداغ ماحالینین «کلیبر» بؤلگهسینده دونیایا گلن عباس قنبری، تحصیلینی اهر شهرینده بیتیردیکدن سونرا، اللینجی ایللرین اوللرینده آذربایجان کندلرینده معلملیک ائتمیش و کند اوشاقلارینین تعلیم تربیهسینده صمیمیتله چالیشمیشدیر. انقلابدان سونرا عالی تحصیلینی تهراندا تماملامیش و معلملیگینی تقاعده چیخانا کیمی تهرانین اطراف محروم منطقهلری او جوملهدن: اسلامشهر، ملارد و اندیشه کیمی شهرجیکلرده داوام ائتمیشدیر.
عباس قنبری، معلملیکله یاناشی اؤزونو آذربایجان ادبیاتیندان آیری گؤرمور؛ صمیمی و یورولماز بیر ادبیات خادیمی کیمی دوستلاری ایله بیرلیکده «نباتی ادبی انجومنی»نی تشکیل ائدیر و عؤمرونون سون زامانلارینا قدهر بو درنهیین فعالیتینین داوام تاپماسیندا الیندن گلنی اسیرگهمیر. او، تهراندا فعالیت گؤسترن آذربایجان ادبی مدنی درنکلری آراسیندا، خصوصیله ده قاراداغ ماحالیندان اولان و بو شهرده یاشایان اینسانلار آراسیندا حؤرمت قازانمیش ادبی- اجتماعی بیر شخصیت ایدی.
ایشیق – آذربایجان ادبیات و اینجهصنعت سایتی – امکداشلاری آدیندان حؤرمتلی معلم، صمیمی اینسان «عباس قنبری»نین ایتگیسینی اونون حؤرمتلی عائلهسینه، دوست – تانیشلارینا و قارداش «نباتی ادبی انجومنی»نین اداره هئیاتی و عضولرینه باش ساغلیغی وئریر و خاطیرهسینی عزیزلهییریک.
ایشیق – آذربایجان ادبیات و اینجهصنعت سایتی
۱۳/۱۰/۱۴۰۴
