یوز
رقیه کبیری
(«ایشیق» سایتینا یازدیغیم ۱۰۰-نجو یازی)
عددلرین سیمبوللاری ایله خیال‌بازلیق ائتمک، سئودییم ایشلردن بیری ساییلیر. بیر، باشلانیش عددی اولدوغونا باخمایاراق،تک تانریلی دین‌لره گؤره، ابدی و متعالی بیر یارادیجی‌نین سیمبولودور، خریستیان‌لارا گؤره آتا- تانری‌نین سیمبوولو و چین‌لی‌لره گؤره وارلیغین گؤزه‌سی و بیرلیک نیشانه‌سی‌‌دیر. قیزیل‌دریلی‌لر ایسه اود سیمبولو، یاشاییش قیغیلجیمی و گونشین ده‌ده‌سی ساییرلار بیر عددینی. منیم اؤزل سیمبوللاریما گؤره بیر عددی، اوزون، زحمت‌لی، استرسلی، تای‌سیز و محتشم بیر سفرین باشلانیشی‌دیر.
««ایشیق»» سایتی یئنی ایشه باشلایاندا، بو سایتدا یایینلانان بیرینجی یازیم، «نرودا» آدلی شعری ایدی، آذر آیی‌نین ۵-جی گونو، ۱۳۹۰-جی ایلده یایینلاندی. بو یازیدا شعریمین کاراکتری نرودایا خطاب دئمیشدی:
نرودا!
ائشیدیرسن عوصیان بوغازیمی
ایسلاق سسیمی !؟
بیر چکیم نفس
یالنیز بیر چکیم نفس هاوالانیر بیزیم یئرلرده
گولوش‌لریمی گئری ایسته ییرم
قایتار!…
بونونلا بئله نه گولوش‌لریم گئری قاییتدی، نه ده بیر چکیم هاوا یئرینه، ایکی چکیم هاوا آغ جییرلریمه دولدو. گولوش‌لریم ده بیر چوخ شئی‌لر کیمی آرخامدا قالدی. من ایسه بیر چکیم‌لیک نفس‌له «ایشیق» سایتی ایله برابر آددیم با آددیم گلیب ۱۳۹۵-جی ایلین سون گونلرینه چاتدیم. چالیشقانلیقدا «ایشیق» سایتی ایله بوی- بویا دایاندیم. نه «ایشیق» سایتی چالیشماقدان یورولدو، نه من.
بو سایتدا یایینلانان ایکینجی یازیم «کؤله»آدلی بیر حئکایه‌ایدی. حئکایه‌نین قادین کاراکتری عاغلیندا کؤله‌لییه یوخ دئسه ده، هر گون مدرن بیر کؤله کیمی یاشاییب، زده‌لنمیش جیسم و جانینی داشیماغا مجبور ایدی. ایش اورا چاتمیشدی کی، یوخوسوندا بئله بغدادین کؤله ساتان بازاریندا، جیسم و جانینین گؤردویو ضررلر اوزوندن، کیمسه اونو کؤله‌لییه آلماغا گؤیول گؤسترمیردی.
اوچونجو یازیم، ۱۳۸۷-جی ایلده قلمه آلدیغیم «قمر» آدلی بیر حئکایه ایدی. یالنیش عرف و قانون دامغاسی بو حئکایه‌نین قمر آدلی کاراکترینین یاشاییشیندا ائله ایز بوراخمیشدی کی، بو دامغا «قمر»ین ایلیک- سوموینه‌جن ایشله‌میشدی.
دؤردونجو یازی، اکسازپام بئله گئجه‌لرینین یوخوسوزلوغونا چاره ائتمه‌ین بیر کاراکترین دیلیندن یازیلمیش «اکسازپاملی گئجه‌لر» آدلی شعر ایدی.
فیثاغورث‌چیلره گؤره بیر، ایکی، اوچ و دؤرد عددلرینین جمعیندن أله گلن ۱۰ عددی تانریسل گوجه مالیک اولان بیر عدددیر.
«ایشیق» سایتیندا ایشیق اوزو گؤرموش اونونجو یازیدا، شعریمین کاراکتری نه قیزیل دریلی‌لره تای ۱۰ عددینی جمعی بیر عاغیل کیمی دیرلندیرمیشدی، نه ده موسی‌نین اون فرمانینا فیکر وئرمیشدی، یالنیز «آیین‌لارین اویونونا» گیریب، شامان‌لار کیمی سوموکلرینی ساییردی.
سیمبوللارا گؤره ۱۰ عددینی اؤزونه وورسان(ضرب ائله‌سن) یوز أله گلر. یوز ایسه کامیل اولماغین سیمبولودور. آمما من «ایشیق» سایتینا یازدیغیم یازیلاریمدا «یوز» عددینه چاتماغیملا نه اؤزومو کامیل بیر وارلیق کیمی حیس ائدیرم، نه ده یازیلاریم کامیل و نقص‌سیز یازیلاردیر. اوسته‌لیک بو عظمتلی وارلیغین قارشیسیندا اؤزومو گؤرونمز بیر ذرّه کیمی حیس ائدیرم. آنجاق یاخچی بیلیرم کی، بیلمیرم.
اگر یازیلاریمین آراسیندا جبری بیر رابیطه آختارسام، بو رابیطه یالنیز اوخوماق و یازماق دغدغه‌سیندن عیبارتدیر. بیلیرم ایره‌لیده اؤیرنملی چوخ ایشلر و اوخومالی چوخ یازیلار وار.
«ایشیق» سایتینا یازدیغیم ۱۰۰-نجو یازی ایله، اومود ائدیرم بیر گون من اولماسام دا، «ایشیق» وار اولوب، ادبیاتیمیزا ییه دورسون.
۱۳۹۵٫۱۲٫۹
