چئویرن: رامین جهانگیرزاده
ترجمه: رامین جهانگیرزاده
رامین جهانگیرزاده

 ۱- حرکت

… دوستوموزون بیری منه حرکتدن یازدی، دئدیم قوی بو حرکته ده بیر شئی یازاق، یوخسا بیزیم حرکت قوتور اولار. سؤز حرکتدن گئدیر.
حرکتین فلسفه‌سی گؤت آتیب، گؤت بورجوتماق دئییل.
حرکت دئینده بیر آز گره‌ک ساغ قولوموزو، بیر آز سول قولوموزو ترپتمه‌لییک.
حرکت دئینده تویوق کیمی یومورتانین اوستونده اوتوروب جوجه‌لری گؤزلمک دئییل. حرکت دئینده بیر آز قول قانادیمیزی آچمالییق.
آذربایجان حرکاتی کورت دوشموش تویوقدور، اؤزوده لاخ یومورتالارین اوستونده اوتوروب خوروزلانان جوجه‌لری گؤزلمک‌دیر.
حرکت دئینده اؤزونو قیسما، نه قدر قیسسان بیر او قدر قیسیلاجاقسان.
من دئییرم هئچ اولماسا حرکتین یولونو باجارماساق دا، حرکتین قولوندان یاپیشاق. یاپیشماساق دا گؤتونه زنجیر باغلاییب دالی چکمه‌یک.

۲- هارای هارای من تورکم

… گئجه‌نین بو واختی یئنه قوچولار یادیما دوشدو. قوچولار همشه فیقور توتوب، بیر آز او یانا، بیر آز بو یانا باخیب، چوخ – چوخ قوچولانارلار. بیر آز های برک گلنده باشلارینی گؤتوروب قاچارلار، سونرا آدلارینی قاچاق نبی قویارلار.
دده‌می چاغیریرام:
دده‌م هئی! قوپوزونو گؤتور گل ایشیمیز آمانا بتدی!
دده‌م قوپوزونو آتیب، تپه گؤزله وایبرده بیر بیرینه گؤز آتیرلار.
هر نه ده‌ییب بیر – بیرینه؛ زامان ایت آشی کیمی قاریشیب؛ هئچ بیلینمیر کیمین بارماغی کیمین بورنوندا، کیمین بورنو کیمین قولاغینا گیریب.
یئنه ده حسن سوخدو ده‌ییرمانی.
آذربایجان صاباح ایکی باشلی اینک دوغاجاق. بیر باشی گونئیه باخاجاق، بیر باشی قوزئیه.
بیلمیرم بو سس نییه بو یازینین سونوندا بئینیمه دوشور: هارای هارای من تورکم!
هارای هارای من دلی اولورام هارای هارای من تورکم دئینلرین الیندن. آی بالا بسدی، سسین باشیما دوشور. آنجاق بیر گون آرزیلاییرام هارای هارای من فارسام سسی باشیما دوشسون.
واللاه هئچ اؤزوم ده بیلمیرم نه یازیرام! چوخ لیللنمیشم، ایچیمدن بالیق توتماق ایسته‌ییردیم، دئیه‌سن آیری بیر شئی‌لر چیخدی.

۳- اوینا گولوم اوینا، مامان قوربان بویونا!

…بیز اویون ایچینده‌ییک، اویونون قایدالارینی بیلمیریک. اویون بزه‌ییریک. ائله بیلیریک کی اوینادیریق، باخمایاراق کی اوینادیرلار بیزی. بیزده ائله اویناییریق کی لاپ سومویوموزه دوشور. اوینا گولوم اوینا، مامان قوربان بویونا.
مامالار میملی ملک
ممی‌لر مین متلک
مین میمیمن میملرینه
ممینی میمله مینک
گول ممد اوزونه گولدو، سن ده هیرتیلدادین، بیر مئتیر آغزینی آچیب اوینادین. ایگیدلر اویناماغین واختی دئییل، گول ممدین تاختی دئییل.

۴- قوچولارین چیلله گئجه سی

… قوچولارین چیلله گئجه‌سی تام فرقلی اولار. قوچولار قوچولانماقلارینی گؤسترمک اوچون، قارپیزی بئله توتوب کسرلر کی آدام ائله بیلر کی آدام باشی کسیرلر.
دیرسکلرینین آلتینا دؤرد طبقه‌لی میتکه قویارلار.
دنه چیرتلایاندا، یاریم مئتیر دالدان دنه‌نی آغزیلارینا تولازلاییب، سونرا قابیغینی توپوررلر چؤله(باشقا اؤلکه‌لرده دئمیشکن ائشییه). آدام ائله حیس ائلر کی ائله بیل جانلی کومبایندیرلار.
قوچولار قارپیزلارین دا دنه‌سینه رحم ائله‌مزلر.

۵- آللاه و اکبر ای صنم حوسنونده حیران اولموشام

… واللاه بعضی‌لریندن باش آچا بیلمیرم، یاخچیلیقلارین دا ایسته‌ینده آدامین اوزونه هر سؤز دئییرلر.
آدامین اوزونه ائله هر سؤز دئیرلر. ای صنم سن بیلیرسن کی سنین او قدر قولتوغونا قارپیز وئریبلر لاپ اؤزوندن چیخیبسان، اؤزوندن باشقا هئچ کیمی به‌ینمیرسن. دئییرسن بوردا منم میصرده کلوپاترا. هر کیم منیم شعریمه نظر وئرسه اراذل و اوباشدیر.
دیکتاتورلاردا بئله دوشونورلر، هئچ کیمی به‌ینمیرلر، اؤزلری قلط قولوط ایش گؤرسه‌لرده باشقالارینین ایشلرینین هامیسینی قلط قولوط بیلیرلر.
آللاه و اکبر ای صنم حوسنونده حیران اولموشام، شاعیرین منظورو حیران گدیی‌دیر. بعضی‌لری چوخ سورعتله گئدیرلر، بعضن گدیکلرین اولماغی یاخشی‌دیر. گدیکلرده مجبورسان سورعتینی آزالداسان یوخسا دره‌یه گئدرسن.
بو دره اوزون دره
گاز وئرمه سن آت بیره
گل یاواش کئچ گدییی
هوپ وورارسان بیر یئره

چاپ

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

آزدان آز، چوخ‌دان چوخ (۱)

رامین جهانگیرزاده
www.ishiq.net

آذربایجان ادبیات و اینجه‌صنعت سایتی

آزدان آز، چوخ‌دان چوخ (۱)

رامین جهانگیرزاده
www.ishiq.net

آذربایجان ادبیات و اینجه‌صنعت سایتی

آزدان آز، چوخ‌دان چوخ (۱)

رامین جهانگیرزاده
www.ishiq.net

آذربایجان ادبیات و اینجه‌صنعت سایتی