۳۱- بیری وار ناغیل دئییر
بیری وار ناغیل دئییر، دئییر کی اولو بابالاریمیز بئله ایدی، ائله ایدی، کئشکه بیر خورتلاتماق دزگاهی اولایدی اولو بابالاریمیزی قبیردن خورتلادیب، یاخالاریندان یاپیشارکن آتایدیق تاریخیمیزدن قیراغا و ساده‌جه بونو آنلایایدیق کی بیز ائله ایندی‌دن تاریخیمیزی باشلاماق ایسته‌ییریک.
۳۲- پاه آتوننان سنین!
اده میرزوپبا! قاشینی دوزلده بیلمیرسن گؤزونو چیخارتما، قوی ایشیمیزی گؤرک. پاه آتوننان سنین! اده میسمارین بیری میسمار! سن اوتور یئرینده تورکدن مودافیعه ائله‌مه، داشی آتیرسان، آنجاق الیندن چیخیب بیزیم تپه‌میزه ده‌ییر. چویوما، سن نه قدر چویویورسان هم اؤزون باتیرسان هم بیز.
۳۳- توپورجک موسابیقه‌سی
اوشاقلیقدا ان سئودیییم اویونلاردان بیری توپورجک موسابیقه‌سی ایدی. بیز او زامانلار مدرسه‌دن گلنده، یول بویوندا شرط باغلاییب، توپورردیک. هر کیم لاپ اوزاغا توپورسه‌یدی، او غالیب گلردی. توپورردیک، توپورجه‌ییمیز گولوشلریمیزه قاریشیب قانادلاناردیلار. ایندی بؤیوموشوک، هر گون نیفرت دولو توپورجه‌ییمیزی، توپوره بیلمه‌دییمیز اوچون اودوروق.
۳۴- چؤرک و داش
دئییرلر چؤرک داشدان چیخیر. دونن بیر چؤرک آلدیم یئیرکن بیر داش دیشیمی سیندیردی. دیش دوکتورونه گئتدیم ۴۰۰ مین تومن ایسته‌دی. من ایناندیم کی ائله دوغوردان چؤرک داشدان چیخیر.
۳۵- بیلمیرم
ـ واللاه بیلمیرم، حضرت عاباس حاققی بیلمیرم، باخ بونو کفنله‌یه‌سن بیلمیرم.
ایندی اؤز ـ اؤزونوزه سوروشورسوز من نه یی بیلمیرم، من نه یی بیلمیره‌می سیزه دئمیرم کی بونو آنلایاسیز کی بعضن آدام بعضی شئی‌لری بیلمز. چوخ زور وئرمه‌یین اؤزونوزه، بو قدرده بیلمک ژئستینی توتوب منیم نه دن بیلمه‌مه‌ییمی آختارمایین، نه اولسون کی آدام ائله چوخ شئی‌لری بیلمز. آنجاق وای او گونه کی آدام ائله حیس ائده کی هر نه‌یی بیلیر.
۳۶- تورموز
منه ائله گلیرکی، اؤزومو تئز چکیرم قیراغا. منه ائله گلیرکی «منه ائله گلن» تورموز کسیب، بو گونلر هئچ کیمین تورموزونا گوونمک اولماز. اؤزونوزدن هادیر اولون!
۳۷- ائولری کؤنده‌لن یار
بو ماهنینین سؤزو بیلمیرم هانسی فضادا یازیلیب، هر حالدا بوردا بیر سوررئال وضعیت اولا بیلر. سیز بیر کؤنده‌لن ائوی نظره آلین یار سیزه چای گتیرسه، چای سیزین تپه نیزه تؤکولمه‌لی‌دیر. آللاه رحم ائله‌سین او کس‌لره کی یارلارینین ائوی کؤنده‌لندیر.
۳۸- اورلانماق
ـ نه یامان تله‌سیرسن، هارا گئدیرسن بئله؟!!
ـ دئییرلر قارا قایادا بوستان اورلانیب، گئدیرم هئچ اولماسا گؤتو قارا قارپیزلاردان الیم اوزولمه‌سین.
هه او دوغرو دئییر، بو گونلر هامینین قولتوغونون آلتیندا زیرپی ـ زیرپی قارپیزلار وار. بوستان اورلاناندا هامی بیر ـ بیرینین قولتوغونا قارپیز وئرر. آللاها گؤره بیر آن دوشونمزکی بوستان نییه اورلانیب؟!!
۳۹- کروز
بو گونلر هامی ساناماقلا مشغولودولار، ائله باخ منه بیری یازدا دئمیشدی جوجه‌نی پاییزدا سانایارلار. ایندی من اوتورموشام جوجه سایماقلا مشغول اولورام، آنجاق ندنسه نه قدر ساییرام بیر نئچه‌سی اسکیک گلیر، گوناهین هامیسی پیشیکده‌دیر. روسلار دا پیشییین نه اولدوغونو بیلمه‌دن اونون اوستوندن کروزلاری آتیر، بیر نئچه‌سی یوخا چیخیر. دوغوردان کروز نه دی؟ خیاردی یا بادیمجان؟!!
۴۰- اؤزوم ـ اؤزومله
هامینی باشقالاری دیغلاداندا، من ده اؤز الیمدن دیغلاییرام. هئچ بیلمیرم اؤزوم ـ اؤزومون باشیما نه اویون آچیرام. هردن اوتوروب اؤزومو اوینادیرام، اؤزومو سارییرام، اؤزومه سؤز آتیرام. اؤزومدن چیمدیک گؤتورورم، اؤزومو دیشله‌ییرم، آغزیمی یوموب، بورنومو توتورام، نفسیمی ایچیمده ساخلاییرام، اؤلومه بیر نئچه ثانیه قالمیش نفسیمی بوشلاییرام، دریندن نفس چکیرم. اؤز ـ اؤزومه دئییرم کی آللاه سنه لعنت ائله‌سین رامین! هئچ بیلمیرسن نه اویون آچاسان اؤزو باشینا.
