۲۱- بیز هارا گئدیریک؟!!
دوغوردان بیز هارا گئدیریک؟!! سیزی بیلمیرم آنجاق من ایسته‌ییرم چوخ اوزاغا گئتمه‌یم، اوزاقلارا اینانمیرام، بلکه ان یاخین یئره گئتمک ایسته‌ییرم، نه ایستانبولا، نه باکی‌یا، نه لوس آنجئلئسه، نه وئنیزه، ته خالام گیله، نه بیبیم گیله، نه عمیم گیله نه ده کی داییم گیله گئتمک ایسته‌ییرم. چوخ زور وئرسم ائله اؤز ایچیمه گئتمک ایسته‌ییرم. اوففف! ایچیمده نه لر وارییمیش! سن دئمه مندن سونرا هر نه دئسن واریمیش.
۲۲- گاه
اوتور یئرینده گؤرک! هئچ دئییرسن بوندان دئییلسن، ائله هئی چویویور. گاه بورنونو قورتدالاییر، گاه آری یوواسینا چؤچ اوزادیر، گاه قاباغا گئدیر، گاه دالی قاییدیر، گاه گؤزلویونو سیلیر، گاه الینی قویور چنه‌سینه هاراسا باخیر، گاه باشینا سئلبه ده‌ییر، گاه ورگانی سویا وئریر، گاه سارالیر، گاه بوزاریر، گاه مال کیمی ائله بیر یئره دونوخوب باخیر، گاه شیللاق آتیر، گاه دا اؤزونو و هامینی سارییب بیر آز یاخشی آدام اولور. قورخما سنینله دئییلم اؤزومو دئییرم.
۲۳- ایلک اؤنجه قاتیق قارا اولوب یا آیران؟!!
بو سوال ایچیمدن دوغولسا دا تأسوفله سیاسی سواللارا جاواب وئرمیرم داها. سیاست عالمیندن چوخداندیر چیخمیشام، ایندی من قویون اولوب، فلسفه توخویورام. ایکی ائششه‌یین آرپاسینی بؤله بیلمه‌سم ده، هئچ اولماسا آرپانین نه اولدوغونو آنلاییرام.
۲۴- اؤزونو توتماق
یئنه ده اؤزونو توتدو، دئدیم آی بالا سنکی بئله اؤزونو برک ـ برک توتوبسان، داها هئچ نه ایله سنی قوپارتماق اولماز. دینین ـ مصبین یانسین آدام دا اؤزونو بو کؤکه قویار. بو قدر اؤزونو توتوب بورنونو دونیانین او بیری طرفینه اه‌یینجک بیرینین الیندن توت قوی ییخیلماسین.
۲۵- اؤزوندن چیخماق
منه دئییرلر چوخ اؤزوندن چیخیرسان! واللاه دوز دئییرلر، آخی من نکوارسیز اؤز قاباغیمی آلا بیلمیرم، بو لامصب اؤزومده کی اؤزومون قاباغینی دا آلا بیلمیرم. آی قارداش، آی باجی! دین حاققی! پیغمبر حاققی! منیم داها اؤزوم آددا بیر کسیم یوخدور داها بونونلا من باجارا بیلمیرم.
۲۶- ۲۱- جی عصرده مؤعجوزه!
هردن گوزگویه باخیب، اؤز ـ اؤزومله اویناییرام، دیلیمی چیخاردیرام، دیلینی چیخاردیر، آغزینی اه‌ییرم آغزیمی اه‌ییر، آلا وئریرم، آلا وئریر، گالا دئییرم، گالا دئییر. دالیمی چئویریرم، دالینی چئویریر، بیردن عصبلریم پوزولور، من ائله بیلیرم گوزگوده کی آدام باشقا آدامدی، ائله دوغوردان باشقا آدامدیر، بیردن بیره، گوزگونون ایچیندن چیخیب، گئدیر، من مات قالیرام اونون بو ایشینه. ۲۱- جی عصرده مؤعجوزه نین نه اولدوغونو آنلاییرام، آنجاق بیر شئیی آنلایا بیلمیرم. گؤره سن او گوزگودن چیخان آدام بالاسی هارا باش گؤتوروب گئتدی. جره گئتدی جهنمه گئتدی.
۲۷- آدام اولماق
بو گئجه چالیشیرام آدام اولام، سونرا فیکیرلشیرم آدام اولماغین نه فایداسی وار. واز کئچیرم بو ایشیمدن، یاخشی دئییبلر گئجه‌نین خئییریندن گونوزون شرری یاخشی‌دیر. آخی آدام دا گئجه‌نین بو واختی آدام اولماغا چالیشار، لاپ من باشیمی ایتیرمیشم.
۲۸- نییه زور وئریریک یازماغا؟!!
ساده‌جه آدام بالاسی کیمی اوتورون یازین، داها زور وئرمه‌یه هئچ بیر سبب یوخدور. نه قدر یازماقدا زور وئرسک بیر او قدر راحاتسیز اولاجاییق. آدام باشقا یئرده زور وئرر، ایشینی قورتاراندان سونرا دا راحات اولار.
۲۹- ان گؤزل اویون
من سیزی اله سالمیشام، سیزی اوینادیرام،سیزینله اویناماق ایسته‌ییرم، مه‌یر بونون هاراسی پیسدیر؟! موطروبلر بیر آز اوخویاندا هامینیزین سومویونه دوشور، ائله او آندا اویناییرسیز. من ساده‌جه یازیلاریملا سیزی اوینادیرام و بو ان گؤزل اویون و اویناماقدیر.
۳۰- ایسته‌میرم
ایسته‌میرم اؤلم، ایسته‌میرم تورپاغا چئوریلم، ایسته‌میرم مجهوللارا قوشولام. ایسته‌میرم، ایسته‌میرم، ایسته‌میرم. نه اوچون تانرینی یاراتدیز، نه اوچون یاراتدیغینیز تانری ایسته‌مه‌دیکلریمی یاراتدی.
