نه اولدو گل-گئدی کسدین؟
تا بیزیم کؤیه گلمیرسن!
آیاقدانمی دوشوب کوسدون؟
یول دؤیه- دؤیه گلمیرسن!
من‌‌می سویوق داورانمیشام؟
سن‌می سانیب‌سان سرت قیشام؟
اؤز ایستی یووامدا خوشام
من، دئیه – دئیه گلمیرسن!
بخت قوشو چیینینه قونوب
شاهلیغی سنه‌می سونوب؟
اؤز ائوینی قصیر سانیب-
منیم‌کین دَیه گلمیرسن!
هانسی یانمیش نؤکر- ناییب
اوستومه شر آدی قویوب؟
آغیر جزا پیلانلاییب-
من عاغلی سَیه گلمیرسن!
هر کؤکده، هر نوتدا دینیر
زیله قالخیر، بمه ائنیر
اوره‌ییم اینله‌ییب دؤنور-
کامانا، نئیه گلمیرسن!
اؤزونو شاهدان اوستون گؤر،
منه ده نه‌دیر قصدین، گؤر،
فقط هردن یوخوما گیر!
یوخوما نییه گلمیرسن؟
یوخودا دا حیاتدا دا
کم‌لوطف اولوبسان «صیاد»ا؛
گؤزله‌ییرسن قبیر اودا-
تورپاق دا یئیه، گلمیرسن!
یوخوما نییه گلمیرسن!
