«حمزه فراهتی» غربتده حیاتلا وداعلاشدی…

چوخ تاسفله آذربایجانین تانینمیش اجتماعی شخصیتی، «صمد بهرنگی»‌نین یاخین دوستو و قیرخینجی ایللر تبریز ضیالی و ترقی‌پرور محفلی‌نین فداکار عضوی «حمزه فراهتی» سیغیندیغی آلمان اؤلکه‌سینده غربتده حیاتلا وداعلاشدی و «آراز» دنیزه قووشان کیمی اودا اؤز مسلکداشی و دوستو «صمده» قووشدو؛ بهمن آیی‌نین ۲۹نجی گونو اوتوز بئش ایلدن آرتیق غربت اؤلکه‌لرده حیات سوردوکدن سونرا، بیر چوخلاری کیمی اؤز دوغما یوردو و آنا وطنیندن اوزاق، وطن حسرتینده ابدی‌لیک سوسدو.
معاصر تاریخیمیزده آدی «صمد»ین اؤلوم ماجراسی ایله یاناشی چکیلن «حمزه فراهتی» ۷۸ ایل عؤمرونون ۶۰ ایلینی زحمتکشلرین سعادتی، خالقین آزادلیغی و بشری ایده‌آللار اوغروندا چالیشدی و بیر چوخ عذاب و اذیتلره معروض قالدی. او «صمد»ین تراژیک اؤلومو ایله باغلی انصافسیزجاسینا بیر عده‌لرین طرفیندن چوخ آغیر اتهاملارلا اوز به اوز اولدو. گناهسیز اولماغینا رغما بو اتهاملارین قارشیسیندا معین سببلره گؤره سوسدو؛ نهایت ۱۳۸۵نجی ایل «از آن سال‌ها و سال‌های دیگر» عنوانلی کیتابیندا بو موضوعنون نه اولدوغونو و صمدین اؤلومونون گئرچک صحیفه‌سینی آچدی.*
«حمزه فراهتی» آلماندا یاشایارکن ادبیاتیمیزین قایغی‌کئشی کیمی آذربایجان ادبیات نمونه‌لرینی فارس دیلینه چئویرمکده جدی فعالیتلر ائتدی. اونون آذربایجانین تانینمیش یازیچیسی رقیه خانیم کبیری‌نین«پرنده‌ها دیگر نمی‌ترسند» و «چشمان کهربایی درخت مر» رومانلاریندان ائتدیگی ترجمه‌لر اوخوجو جمعیتی طرفیندن اوغورلا قارشیلاندی. «پرنده‌ها دیگر نمی‌ترسند» رومانی ۱۳۹۸نجی ایل ایراندا «مهرگان ادب» مکافاتینی قازاندی. رقیه خانیم کبیری‌نین «دونیا قابار چالیب یولداش» اثری حمزه فراهتی‌نین سرگذشتی اساسیندا یازیلیب و اونون «دوشرگه» آدلی رومانینین اساس شخصیتلرینین بیری حمزه‌نین تمثالیندا یارانیبدیر.
«ایشیق»- آذربایجان ادبیات و اینجه صنعت سایتی امکداشلاری آدیندان، گؤرکملی اجتماعی شخصیت و ادبیاتیمیزین قایغی‌کئشی «حمزه فراهتی»نین ایتگیسینی آذربایجان خالقینا، ادبی جمعیتیمیزه، حؤرمتلی عائله عضولرینه، یولداشلارینا و دوست- تانیشلارینا باش ساغلیغی وئریر، عزیز و شرفلی خاطیره‌سینه عشق اولسون دئییریک.

«ایشیق»- آذربایجان ادبیات و اینجه صنعت سایتی
۲۹ بهمن ۱۳۹۹
***

*«صمدبهرنگی‌»نین اؤلوم روایتینی «حمزه فراهتی»‌نین دیلیندن ایشیق سایتی‌نین آشاغیداکی لینکینده اوخویا بیلرسینیز:

مرگ صمد بهرنگی از زبان تنها شاهد ماجرا