“یئنی تبریز”، اوستاد هریسی‌نی عزیزله‌دی
آذربایجانین تانینمیش اجتماعی شخصیتی، تدقیقاتچیسی و کلاسیک شعر نوعی نماینده‌لریندن اوستاد موسی هریسی‌نژاد(هریسی)، یئنی تبریز ادبی- مدنی درنه‌یی طرفیندن عزیزلندی. آذربایجانین بیر چوخ ادبیات و صنعت نماینده‌لری و اجتماعی شخصیتلری‌نین اشتراکی‌ایله قید اولونان بو طنطنه‌لی مجلیس، تیر آیی‌نین ۱۵ینده تبریز شهرینده کئچیریلدی.
یئنی تبریز ادبی- مدنی درنه‌یی‌نین صدری شاعر و ادبیاتشناس ناصر داوران، درنه‌یین طرفیندن وئریلن بیانیه‌نی قرائت ائتمک‌له، بو عزیزله‌مه مراسیمی آچیق اعلان ائتدی. سونرا گنج طلبه “نرگیز هریزلی” اوستادین بیر غزلینی قرائت ائدیب، اونون شخصیتی حاقیندا اؤز تاثراتینی بیلدیردی. اوستادین حیاتی باره‌ده حاضرلانمیش بیر قیسا فیلم، مجلیسین بو حصه‌سینده گوستریلدی و مجلیس حسن کافی و رحیم عباسی جنابلاری‌نین اجراسیلا دوام تاپدی. مجلیسده هاشم ترلان، میرزه شهرک، سلیمان ثالث، اومید، مهران هریسی، ممدلی، دومان اردم، جعفر تانیش، غلامحسین فرنود، حسن ایلدیریم، دکتر گوگانی، رضا همراز و دکتر حاجی‌زاده، اوستاد هریسی‌نین حیات و یارادیجیلیغی باره‌ده دانیشیقلار آپاردیلار و اؤز شعرلریندن اوخودولار.
مجلیسین قورتاریشیندا آذربایجانین گؤرکملی شاعر و اجتماعی شخصیتی اوستاد حبیب فرشباف اوستاد هریسی‌نین حاقیندا دانیشارکن، مجلیسی باغلادی و”یئنی تبریز” درنه‌یی‌نین عضوی مهین خانم صفری اوستادا حاضرلانان تحفه‌نی اشتراکچیلارین گور آلقیشلاری ایچینده اونا تقدیم ائتدی. اونونلا برابر درنه‌یین طرفیندن نشر اولونان اوستادین “گول چارداغی” عنوانلی شعر مجموعه‌سی اشتراکچیلار آراسیندا پایلاندی.
چوخ طنطنه‌لی کئچن بو مجلیسده موسیقی صنعتیمیزین گؤرکملی نماینده‌لریندن عاشیق حسن اسکندری، عاشیق چنگیز مهدی‌پور و حسن آذربایجان(دمیرچی)، اؤز محتشم چیخیشلاریلا، اشتراکچیلارین گئنیش رغبتینی قازاندیلار. اونلاردان علاوه، ماهر نی چالان غفاری و تارزن ناصر بهنژاد مختلف زامانلاردا چیخیش ائتدیلر و آردیجیل آلقیشلارلا قارشیلاندیلار. رحیم عباسی‌نین باشچیلیق ائتدیگی آذربایجان ملی رقص گروپونون چیخیشی مجلیسین ان پارلاق حصه‌لرینه چئوریلدی.
اوستاد هریسی‌نین عزیزله‌مه مراسیمینده آذربایجان صنعت آداملاریندان: محمدعلی نقابی، سید سلامت، صمد چایلی، پیام سرابلی، منوچهر عزیزی، حامد ایمان، ع.آغ گونئیلی، ائلدار موغانلی، حسن انداچه، حسن ایرانی، مسعود آذر و … س اشترک ائتمیشدیرلر.
بو مجلیسه دایر شکیل‌لر الیمیزه چاتارسا، اونلاری تقدیم ائده‌جه‌ییک.
یک پاسخ
سلام، درین حؤرمتلرله. اوستاد هریسی نین عزیزله مه مراسیمی باره ده بیر چوخ دئمه لی سؤزلر واردیر کی باشقا بیر فرصت طلب ائدیر. آنجاق من بو قده رلیک جه کیفایت له نیرم کی: بو مراسیم اوست- اوسته اوستادین احوال- روحیه سی و یازیب یاراتدیقلاری و عرفان و مذهبی یارادیجیلیقلارینی نظره آلاراق، اونا و بیر عارف شاعیر اوچون اویغون دئییلدی. لاپ آچیغینی دئییم کی بو مراسیمده چیخیش ائدنلر- یالنیز بیر نفردن سونرا- سؤزلرینی آللاه آدییلا باشلامادیلار. من هئچ کیمین عقیده و مرامینا توخونماق ایسته میرم. آنجاق بیر عارف مسلک و مذهب اوغروندا یازیب، یارادان آغ ساققال شاعیرین عزیزله مه مراسیمینده بو کیمی تشببوثلر یاخشی گؤرونموردو.
باشقا یؤندن، اوخونان مقاله لر چوخلوق خاطیره سایاغی و اؤترگی دویغولاری احتوا ائدیردی. اوستادین اثرلرینین داشیدیغی آنلاملار و او اثرلرین کیفیتینه گؤره علمی بیر مقاله اوخونمادی. یا اوستادین باشقا مختلیف ساحه لرده چالیشدیغی و یاراتدیقلاری اثرلر باره ده ده آز بحث اولوندو و آز آچیقلاما وئریلدی. منجه بو مراسیمده بیر چوخ غیر لازیم بؤلوملر او جومله دن آذری رقص، نئی چالما، ایرانی سوننتی آواز و ساییره نین یئرینه اوستادین یارادیجیلیغینا گؤره علمی بحث لر گئدیب و علمی مقاله لر اوخونسایدی یاخشی اولا بیلردی. هر حالدا یئنی تبریز ده ر نه یینه اوغورلار دیله ییرم. ساغ اولون…