احمد یوخوسوندا گؤرور کی، گوزه‌ل بیر یاز گونودور. کندیرینی و بالتاسینی گؤتوروب مئشه‌یه یول‌لانیر. یول اوزاندیقجا اوزانیر. لاله‌لی دوزلردن کئچیر. جه- جه ووران قوشلار احمدین باشینا، چینینه قونوب، شن- شن اوخویورلار. لاله‌لیک قورتاریر. احمد آغ چیچک‌لر دنیزینه دوشور. بوردا اونو زر ناخیشلی کپنک‌لر سالاملاییر. زومرود یاماج‌لی تپه‌نی آشان کیمی، گؤزلری اؤنونده باشقا عالم جانلانیر. شاه قیزی قیرخ گوزه‌ل قیزلا سئیره چیخیب. او ظریف‌لییی‌ایله بوتون قیزلاردان سئچیلیر. قیزلار دوم‌آغ، شاه قیزی ایسه آل-الوان گئییمده‌دیر. قیزلارین آیاقلاری یئره دیمیر، قو قوشلاری کیمین آستاجا قاناد چالیر، هاوادا سوزور و شاه قیزینی ظریف اللری اوستونده آپاریرلار. احمد حئیرانلیقدا بو منظره‌نی سئیر ائدیر؛ اؤزونو دونیانین ان بخته‌ور اینسانی سانیردی. بیرده گؤردو کی قیزلارین دسته‌سی اونا چاتماقدادیر. بیر گؤز قیرپیمیندا قارشیداکی ایری پالید آغاجینا چیخدی. قیزلار لاپ یاخینلاشدی‌لار. احمد یارپاق‌لار آراسیندا گیزلندی. قیزلار پالید آغاجی‌نین آلتینا چاتاندا، شاه‌قیزی اینجه سسله دئدی:
– یورولدوم! دینجلمک ایسته‌ییرم!
قیزلار اونو اللری اوستوندن یئره ائندیردیلر. یئل پازه‌لری ایله اونو یئلله‌دیلر. شاه قیزی یاواشدان الینی الینه ووردو. سن دئمه، بو رقصه ایشاره ایمیش. قیرخ قیزین رقصی باشلاندی. قیزلارین آیاقلاری سانکی یئره توخونموردو. رقص بیتن‌کیمی، گؤی گورولدادی؛ ایلدیریم چاخدی؛ لئیسان باشلاندی. قیزلار بیر گؤز قیرپیمیندا یوخ اولدولار. احمد اؤزونو یاغیش‌دان قوروماق اوچون بیر قد‌ه‌ر آشاغی ائنیب، قوجا پالیدین آلتینا گیردی.
– دور باشینا دؤنوم! گون،گون اورتا اولدو. اودونون واختی کئچیر. ایستی‌‌یه دوشه‌جک‌سن- دئیه، ننه‌سی اونو یوخودان اویاتدی.احمد گؤزلرینی اووشودوروب، آیاغا قالخدی. ال- اوزونو یودو. شور چوره‌ک باغلاماسینی و بالتاسینی گؤتوروب، یولا دوزلدی. بو خوش یوخوسونوایسه اوزون موددت اونودا بیلمه‌دی.
