منی یادان چیخاراسان،
بیر آن سنی اونوتمارام.
یا اوز دؤندریب، آتاسان،
بیر آن سنی اونوتمارام.

دوران منی سینسیتسه‌ده،
عؤمروم چورویوب بیتسه‌ده،
قبریم اوسته اوت بیتسه‌ده،
بیر آن سنی اونوتمارام.

منی اونوتسان آی گؤزل،
آرزولاریم اولار خزل،
قان آغلارام غزل- غزل،
بیر آن سنی اونوتمارام.

جانیم قوربان اؤز یاریما،
وفالییام ایلقاریما،
پاییز چؤکسه باهاریما،
بیر آن سنی اونوتمارام.

زامان دؤنمه‌یه‌جک گئری،
سؤکولجکدی دان یئری،
اؤلو اولسام یادا دیری،
بیر آن سنی اونوتمارام.

دیزلریمه دایاق اولسان،
قارانلیقدا چیراق اولسان،
یاخین اولسان، اوزاق اولسان،
بیر آن سنی اونوتمارام.

سن هاراییم ، هاییم اولسان،
محبت آلاییم اولسان،
ایتمیش سئوگی پاییم اولسان،
بیر آن سنی اونوتمارام.

سنسیز دونیا نه‌یه لازیم،
قیشا دؤنر یاییم،یازیم،
قان آغلایار تئلی سازیم،
بیر آن سنی اونوتمارام.

گل منی اؤزوندن قوغما،
هیجران دنیزینده بوغما،
یاد اولاسان،یا دا دوغما،
بیر آن سنی اونوتمارام.

سنسن منیم قارانقوشوم،
ایلک باهارا وورولموشوم،
سنسیز چاشار عقلیم، هوشوم،
بیر آن سنی اونوتمارام.

سئوگی‌دیر باشیمین تاجی،
اولمارام نامرد محتاجی،
یوز کفن چورودسه «حاجی»،
بیر آن سنی اونوتمارام.

باهار ۱۳۸۱