بویالار اولچوسو
مسعود آذر
پاییز…
پاییز بوریوب کائیناتی؛
وارلیق پاییزا یؤنه‌لیر،
پاییزا دوغرو آددیملاییر.
داغلارین جیداسی
سحر ائرته‌ایکن
شافاقا یوخ،
پاییزا بویانیر.
دنیز اوزره قاچان دالغالار
گونش باتارکن
قانا یوخ،
پاییزا به‌له‌نیر.
هر یئردن پاییز اله‌نیر.
مئشه
پاییز رنگی‌دیر؛
یئر،
گؤی،
توپراق،
سو،
آرخ ،
بولاق،
پاییز رنگی‌دیر؛
منیم گؤزلریمین گیله‌سی‌ده
پاییز رنگی دیر،
پاییز رنگی.
سنین گؤزلرینین بویاسی
ماوی دیر،
ماوی.
عؤمور آغاجلارین
ماوی‌لیکدن سو ایچیب،
ماویلیکده بوی آتیر.
سنه سودا ماوی‌دیر،
چؤره‌ک‌ده.
دنیز ،
مئشه ماوی دیر ،
داغ ماوی.
سنه حیات‌دا ماوی‌دیر ،
اوره‌ک‌ده.
اوره‌یینده یئرله شن ـ
اولو دیلک‌ده.
سنین ماوی لییندن-
حیات جان آلیر،
داوام تاپیر.
گله‌جه‌یه ساری یول آچیر؛
سنده ن تکی ـ
ماوی لیک قالیر.
