ع. یالچین
سنسيز
آليب سني مندن آپاردي يول‌لار
حسرت چيچک‌لندي کؤنول باغيندا.
بير زامان اوزونه آچيلان قول‌لار
بوينو بوکوک قاليب غم اوتاغيندا.
قولاغيم تامارزي شوخ قهقهه‌نه،
سسيم نفسينله قيزينمير داها.
يول‌لار غريبسه‌ييب آياق سسينه،
باخيشيم کولگن‌له گزينمير داها.
سنسيز پوچورلامير نار آغاجي دا،
شيلتاق لپه‌لرده سوسوب دانيشمير.
سسيمه سس وئره‌ن قاغايي‌لاردا
مندن اوز چئويريب، کوسوب دانيشمير.
يولونا چيله نيب گوزومون نورو
هر آياق سسينه ديک ديکسينيرم.
قلبيمدن قلبينه اوجالان يولو
نييه گئدنميرم, نييه؛ بيلميرم!
