آیریلیق‌لار
ع. یالچین
آييرديلار گولو اتك‌دن
آريني پتك‌دن آييران كيمي؛
چاتلادي آرزولار
اوچوقلادي خيال‌لار.
دوشوندوك:
بلكه بير گولوش
ياكي، بير گؤروش ملهم اولا،
ساغالدا بو چاتلاق‌لاري
بو اوچوق‌لاري.
اسدي حسرت اسيمي،
الندي جانيميزا، قانيميزا
غريبليك موسمي؛
اسيم‌لر طوفانا دؤندو
سيزيم لار طغيانا دؤندو
يارغان‌لاندي آرزولاري
چاتلاق‌لاري،
قارغالاندي
خيال‌لارين اوچوق‌لاري.
آييرديلار بيزي بيزدن
اودو كؤزدن،
ايشيغي گؤزدن
آييران كيمي.