من اؤز اینانجیمی یئله بوراخدیم،
او منی اؤزومدن آلدی، گؤتوردو.
اؤزگه نوت اوستونده جوشوب چاغلادیم،
کؤنلوم اؤز هاواملا اؤنجه اؤتوردو.
نه گلیب باشیما اؤزومدن گلیب،
گوناهیم بیلیرم اودور، نهدندی.
بونا همقافیه آتا سؤزو وار:
«سؤز قوشدو، بوراخسان اوچوب گئدندی.
اوچدو او قوش کیمی اینانجیم، اودور،
ایندی هر بیر یولا دوشور گوزاریم.
سرسملر کیمییم هاردا گزیرم،
بو تن اؤزوم اوچون اولوب مزاریم.
آغزیمین دادی یوخ، الیمین دوزو،
بونو بیلهنیم یوخ، دوشونهنیم یوخ.
دئمیرم یالقیزام تنها قالمیشام،
دوشونن دوست- تانیش اطرافیمدا چوخ.
بیر دردلی یارام وار ایچیمده گیزلی
اؤزومدن باشقاسی اونو بیلنمز.
دوشونن اولسادا بوتون دوستلاریم
کؤنلومون یاراسین آخی گؤرنمز.
ایچیم آغلاسا دا، اوزوم گولمهده
درک اولماز بیر دردی دئمک نه لازیم!
هئچ اونو دئمیرم اؤزوم اؤزومه،
اؤزوم اؤز ایچیمی یئمک نه لازیم!
هر نهیی گؤرمگه گؤز ایستهمیر کی،
درکی اولان گؤرر گؤرولمهیهنی.
یارام دوست یاراسی، دوشمندن دئییل،
بیلن بیلمهلیدیر دئییلمهیهنی.
اودور اؤز یوکومو اؤزوم چکیرم،
ائشیدن ال- البت دانلایار منی.
آمما اؤز آغلیملا بعضا دئییرم:
تاپیلار بیری ده آنلایار منی.
من اؤز اینانجیمی یئله بوراخدیم،
او منی اؤزومدن آلدی، گؤتوردو.
اؤزگه نوت اوستونده جوشوب، چاغلادیم،
کؤنلوم اؤز هاواملا اؤنجه اؤتوردو.
مرداد ۱۴۰۵- تهران
