پابلو نرودا
کیان خیاو
بو منم:پابلو نرودا
کؤکسومده داش یازیلارین هوروتلری.
بو هوروتلرین ایچیندن باش قالدیرمیش
اؤلموش-اسکیمیش یالنیقلا دانیشماقدا
اورونلریم اوچوب-داغیلمیش قالا‌لار قوخوسوندا.
بو منم:پابلو نرودا
اووئرکوتومون آلتیندا ایلدیریم چاخیشی‌یلا
شیلی‌نین قارانلیق سسسیزلییینده.
آاااه،
کارائیب دنیزجیکلری
گؤتورسه‌یدی چانتاسیندا آجییان اؤیکولریمی!
بو منم:پابلو نرودا
چییینلری ماچوپیچو آتامام من
گؤزلری کارائیب دنیزی آنام.
باغیر باسمیش،اوتورموش
دیلکلرینه ارمه‌ین یازیق یالنیقلار اؤنونده.
بو منم:پابلو نرودا
قویلاغیندان باش قالدیرمیش
باشقا قویلاقلارا باش چکن اؤلو.
سیغراق سوزن بؤیوک آلئنده‌لرله
و سئویشمه‌دن وورولان
او سئودییی گؤوده‌لره سارماشا بیلمه‌ین سارماشیقلارا.
سارماشیقلار،سارماشیقلار
او ساریمتیل ساچلاریندا قان لاختاسی یلا!
باخسان،اونلارین قیپ-قیزیل یاناقلاریندا
قیپ-قیزیل دوداقلاریندا،دیرناقلاریندا
آتامین‌دا اؤپوش یئرینی گؤره رسن
آنامین‌دا.
بو منم:پابلو نرودا
هانکیسا موسکووادا
هانکیسا ایتالیان قوخولو کؤینکده
هانکیسا ویکتور دادان گیتاراسی‌یلا الینده
هانکیسا کاپری آداسینی تامسینان تورکولری یله.
اؤپه-اؤپه
بارماقلاریمین اوجوندان یاغیشلار سرپه-سرپه
آییق یاتین دئییرم ماتیلده‌لره
آییق یاتین
سیز بیر داها آییلمایاجاقسینیز.
بو منم:پابلو نرودا
اؤز قویلاغیمدان‌دا دئییل
باشقا قویلاقلاردان باش آلمیش گلمیش
ساری ساچلی سارماشیقلار
ماوی گؤزلو ماتیلده‌لر قوخوسونا.
سونرادا یابانجی آتلار قویروغونا باغلانمیش
سورونموش یاغیش اؤیکوسونو اونودان
اؤزقیییملی ایلدیریملار اؤلکه‌سینه.
بو منم:پابلو نرودا
کسیک باشلارا اسنلیک دیله‌ییب دوردوم
دوردوم‌دا قالدیردیم بویومجا تورپاغی
سارماشیقلار
بیر بوی داها بؤیوک اوجالسینلار دئیه
و داها بؤیوک-بؤیوک بیلسینلر دئیه
کیملیکسیز بیر هوروت دئییل
بو داش گؤوده‌لره یازیلان سئوگی.
بو منم:پابلو نرودا
اسکیمیش اووئرکوتوما
سؤنمز اودوما
بیر اؤزن گؤسترن سارماشیق وارمی؟
اؤلمه میش دیری‌یم هله
کؤینه‌یی گؤز-گؤز قورشوندان
اوریی کؤز-کؤز قورغوشون قورولوشوندان
دؤرد چئوره‌دن
یاراسینا دوز سپیلن بومبا‌لارین آنیندا.
بو منم:پابلو نرودا
او قویلاغی اونودولموش
آنجاق او آدی سؤیله‌نن نئچه دیلده.
هئئئی،سنینله‌یم سنینله!
دینله‌ییرمیسن منی؟!
هئئئئی،ماتیلده!
ماتیلده!
فروردین آیی ۱۳۹۰
