ایچینده کی دَلی‌نین، آل ایپین اَلینده یورو
بوتون کئچیت، خیاوان، دؤنگه‌لر قارانلیق دیر
ایچینده‌کی دَلی‌نین آل ایپین، اؤزونله سورو
یاغیشسیزیق، قورو شاختا، سازاق، بورانلیق دیر
عاغیللی‌لار شهه‌رین چاره‌سینده مات قالدی
ایچینده‌کی بو دَلی بلکه شَهره چاره قیلا
وَ سون قویا شهه‌رین توز- دومانلی گونلرینه
بو قارغیمیش شهه‌رین اَحوالی بیرآز دورولا
دَرین باخیشلیدی باخما گؤرونجه‌ده کَمی وار
ایشاره بارماغی باخسان گونَش ائوین توشلار
آبادلیغین دَلیسی او، آزادلیغین دَلیسی
بیزیم عاغیللی دَلی، کیم دئییر وئران خوشلار؟!
نئجه دَلی؟! گئجه، گوندوز باشیندا مین وولقان
نئجه دلی؟! داماریندا گَزیر دَلی عوصیان
نئجه دلی؟! جانا گلمیش، بئزیکمیش، اُود پیله‌ییر
باشیندا فیرتینا قوپموش، ایچینده قُور، هَیَجان
اونو بوراخ باشینا، اولدوزون ایزین توتسون
صاباح بو قارغیمیش ائلده گونش قوناق گله‌جک
اینانماسان دا اینانما، بو یورد، بو ائل، بو اوبا
او چارپاشیق دلی‌نین کولگه‌سینده دینجله‌جک!
