منی آل باغرینا بو سمّی‌لی سسلردن اوزاق
اوخو عشق آیه‌سینی ساختا هَوَسلردن اوزاق
باشیمی آل سینه‌نه، قلبینی دینلَرکن اویوم
ماویلیک‌لرده اوچوم، باغلی قفسلردن اوزاق
نَفَسین گول عطیری، داغ هاواسی، تَر ناناسی
اییله‌ییم خوش نَفَسین، لئه‌لی نَفَسلردن اوزاق
باخیشین اَمن- آمانلیق، اولو قارتال باخیشی
بوک منی گؤزلرینه لئش‌قوخو پیس‌لردن اوزاق
شمسِ تبریزی کیمی ساچ منه آی یئر گونَشیم
مولوی تَک دورولوم‌ قاپ-قارا هیس‌لردن اوزاق
یول چتین، چَن بورویوب گؤز- گؤزو گؤرمور، اوره‌ییم
توت الیمدن منی ائت قورخولو سیس‌لردن اوزاق
سنله اولوی‌لَشیرم، یئددی گؤیو سئیر ائدیرم
ائله یونگوللَشیرم عادیجه حیسلردن اوزاق
باخیرام من سنه هئی گوزگوله‌شیر روحوم، اوزوم
قیناما گئن گزیرم صونعی بو سوس‌لردن اوزاق