سن اؤزون
چیچکلی شعرین دوز عنوانی
قاتقی‌سیز آرزولارین
یاشیل اوبرازی.
گؤزه‌للییینی بایراق ائدیب
قورخودان باج آلماقدا
بیزیم کیمی آل وئرچی‌لرین
بوش یئرین
قادینلیغینلا دولدوردون.
جنون قول قاناد آچیب
بنؤوشه سجیه‌نی
اتهام ائله‌مک اوچون.
سن آمما
«فیدیاس»ین صنعتین
«اوسکار» دیلینده سرگیله‌دین.
اؤزون اولدون
سناریستی ده
رئژیسورو دا
آکتیورو دا.
غرورلو بیر آهو کیمی
گؤوده‌نین هانکی سویدان اولدوغونو
گره‌ک‌لرینی باغیردین.
آی باشینین چئوره‌سینده هاله‌له‌نیر
قوش‌لار اوتورور چیینینده.
مانقورت‌لار
یازیق یازیق عاجزله‌ییر
سنده حلول ائده‌ن نئجه‌لییه.
۱۴۰۳/۰۸/۲۷
