ائویمین آدرسی سیلینیب
کپنک‌لرین دفتریندن.
شعریمین قاپیسیندان
نه بیر گونش گیریر ایچری
نه بیر چیچک.
یامان یئرده گونوموز آخشام اولوب
یاغیشین جنازه‌سین
ماهنی‌لارین چیینینده داشیییریق
دده قورقودون
دیلینه یاساق یازیلمیش قوپوزوندا.
دنیز یالوارا یالوارا قالیب
یالاندان گورولدایان
قیسیر بولودلارا.
قارا چوخورون ائولادیییک
اونودولموش چای‌لارین
بوغولموش سسی.
توتورسان الیمدن
کؤنوللو داوران
قورخوسوز، تمناسیز
گئجه‌لرین اولدوزو
دوستومون اؤزو کیمی
موشتولوق قوخویان وطنداش کیمی.
یول‌لارین بیر ایشی
قارانلیغی خاطیره‌لشدیرمک‌دیر
اوزومو معنالاشدیرماق.
من نه بختیارام
حیاتی بؤلوشدوردولر
پاییما یولچولوق دوشدو!
۱۴۰۳/۰۷/۲۴
