چوخدان کسیلیب یاغیش
دامیر هله دامیمیز؛
سامان سَپیب تاپداییرام، دامیر…
ائو توتغون،
پَردی‌لرین بولوتلاری دالغین
یاغیر
دامیر،
آنامین گؤزلرینه دامیر
آتامین اووجونا
اوووج دولور، چیله‌نیر
داشیر آنامین گؤزلریند‌ن، دامیر،
باجیمین تای‌سیز آیاق‌قابینا دامیر
دامیر باخیشلارین سوسوز ناخیشلارینا
پوزوق حیاتین،
دَرین یارالارینا دامیر
دامیر آنامین یوخوسوز گؤزلرینه…
داما چیخیب آغلاییرام
گؤز یاشلاریم دامیر:
بوش مندیله، باغلی قالمیش بوغچامیزا
دامیر سؤنموش اوجاغیمیزا؛
سئوینج سَپیب، تاپداییرام کد‌رلری،
یئنه دامیر
دامیر کد‌ر ائویمیزه، ائشیییمیزه
کدر دامیر
آنامین گؤزلریند‌ن اوره‌ییمیزه.