۱) بیز
ایت قارشیمدان گلیر
قورد پئشیمدن
ایتین آغزیندا ایپ وار
قوردون دیش‌لرینده قان
ائرته‌دیر،
ایپین اوجو سنین الینده
منیم گؤزومده قان چاناغی
باشقاسی یوخ،
اورتالیقدا بیزیک یالنیز
سَن‌له
من…
۲) چیخی
سئوینجی چیخین مندن
گولوشو پوزون
کسین دوداغیمدان اؤپوشلریمی
ساچیمدا گول‌لنن سئوگینی یولون
آلین ال‌لریمدن باهار پاییمی…
عئینی آدامام من
نه‌ییم آزالدی؟
نه‌یی ایتیردیم من؟
نه‌ییم چاتمادی؟
کدر یئرینده‌دیر،
من یئریمده‌یم…
