سئرچه‌لر اوخویور
اووجومو توتورام دیمدیکلرینه
به‌یه بیر اوووج اوخوماق گتیردیم سنه
به‌یه توختادا بیلدیم اوره‌یینی او ایپک سسدن
باغچامیزدا توت یئتیشیب،
شیرینلییی دریر‌م سنه گؤزلریمله
کؤوره‌ک بنؤوشه‌لر،
چینار آغاجی‌نین کؤلگه‌سینده بیتیر
بیر کؤینک آییراجایام بنؤوشه قوخوسوندان،
او کؤلگه‌لردن پای وئره‌جه‌یم سنه
داغ اَته‌یینده
بولوت-بولوت سکوت گَزیر
دوم-دورو سوکوتدان،
بولاق-بولاق ایچیرده‌جه‌یم سنه
دوداقلارین قاچسین دییه،
کَپَنه‌یین گولوش بوقچاسینی آچاجایام،
یاز بویالی گولوش بوقچاسینی
گئجه درینلییی وار قارقالارین گؤزلرینده
د‌رین یوخو باغیشلایاجایام سنه قارا گؤزلرد‌ن
یووالاندیراجایام گؤزلرینی درین یوخودان
…
نارین چیچک‌لره دومان ده‌ییر
یاغیش اؤپور لاله‌لری
یاغیش اؤپوشونو اؤیره‌ده‌جه‌یم دوداقلارینا
دومان سَرینلییینه سَره‌جه‌یم باخیشلارینی
کَپَنه‌یین گولوش بوقچاسینی آچاجایام،
بیر اوووج اوخوماق گتیره‌جه‌یم سنه…