منی کوله‌یه وئر
سووور قانادیمی مئشه‌لرین اوستونه
یئلدن آنجاق سنه دوست چیخماز
بیر گون ده گؤررسن
من اوتوران یئر
آجیغینا گلیر.
شعریمین سون شامی‌دیر
سؤزجوک‌لرین پریشانلیغی؛
یئل بو قیامتی
قوجاق قوجاق داشیییر دفتریمه
دفتریمی دالغالاندیران ساچینا.
خبرسیز گؤروش‌لرین بایرامی
دونیانین ان گؤزه‌ل قایداسی
سن بو نارلیق احوالاتین
اسیرگه‌دین شاعرینه.
ال‌لریم بوشونا یالواریر ال‌لرینه
کؤرپو قورماق ایسته‌ین
گؤزونه یالوارمالیدیر
عمان‌لارین گیزلی قات‌لارینا.
۱۴۰۳/۰۵/۱۴
