سندن اول
بیر مملکت دار آغاجیندان آسیلیر
نئفت قویولاری
یئدییین قوسور سیلکنه‌رک زلزله‌دن
تورپاغین بطنینده باغلانان نطفه‌لر
خاریج ایفالارلا تقدیم اولور
اود سؤنور حیاتین گؤزونده.
بیر آز بو یانلیقدا
بیرگؤزلو قیزلارین یارالی گؤزه‌للیک‌لری
فتح ائدیر ائستئتیکانی
کامیللشدیریر فلسفه‌نی.
شعورسوز ساچمالار
شعورسوز بارماقلاری یامسیلاییر
قودورغون تئتیک‌لرین یورولمازلیغیندا.
گؤز ایشله‌دیکجه
قورد دومانی،
گؤیرچین جنازه‌سی‌دیر.
گدیک‌لرده پوسقو قوران
بوینوزلو پادشاهین
فیکری قانا بله‌نیب
الی یالانا.
قورویا بیلمه‌دیییم سؤزجوک‌لر ایسه
باشقا سؤزجوک‌لرین جیلدینه گیریب
مجازدان بویلانیرلار.
۱۱/۰۳/۱۴۰۳
