قارپیز یئییرسن کسیم؟
چوخ اوزاقدا دوروبسان
سئوگیلیم دئمک اولمور.
دوردوغون یئرده
توت یاغاردی سندن
بیدانه توت.
تورپاق اهلی
قبیرده تامسیناردی،
موشتولوق اولاردی قوش‌لارا.
چوخ دا قیناما منی
زامانی دایاندیرماق اولماز کی
یوخسا ایندی چور یئرینه
هاوادا بال قوخویوردو.
آلنیمین قیریش‌لاری
ایشین باشلانغیجیدی
سؤزلرینده سوزالان آتش
سببسیز دئییل
آغاج کی قورودو
بولودو یورمامالیسان.
بنؤوشه دیلین باشا دوشمه‌یه
سنی دوننکی کیمی یازماغا
نئچه کؤینک یول اوستونده دورمالییام؟
۱۴۰۳/۰۲/۲۰
