جاوان ایکن ماکیاژ، داراق
وئریر ایچ اوزونه دوواق
قارا اوز ده گؤرونور آغ
سونوندا دوزه چیخاجاق
سولدوراجاق خزان یئلی
بو یاشیل گولشنی، گولو
آغارداجاق سونبول تئلی
ساریسی بئزه چیخاجاق
گیزلتسن ده اوز قارانی
دئشه‌جک زامان یارانی
کشف ائده‌جک ماغارانی
آستاری اوزه چیخاجاق
آشارسان سَکسَن سکگیزی
جاوانلیغین قالماز ایزی
آیدینلادار قیریش، گیزی
تضییقین یوزه چیخاجاق
سانیرسان هله باهاردیر
باغلار دولو گیله‌نار دیر
هله عؤموردن چوخ واردیر
لاپدان قار دیزه چیخاجاق
ایبره‌لر قاچیشیر تووولو
ائله گئدیر باشی لووولو
یاشلاندیقجا اینسان اوغلو
ایچ قاتی، اوزه چیخاجاق
کیمسه گئتدیکجه نورلاشار
قوجایکن ده جاوان یاشار
کیمسه‌لر ده مئیمونلاشار!!
قینین‌دان تزه چیخاجاق
گیلئی‌لنمه آی خَردَجَل
باشیندا فیرلانیر اَجَل
کئچمیشینده دولاش، گیجَل
پیس ایچین اوزه چیخاجاق.
*گیز: رمز، راز
**تضییق: فشار خون
***ایبره‌لر: عقربه‌لر
