یئنه ساری کؤینه‌یینی گئییبسن
هئی..‌. ساری کؤینک!
یاداشینداکی قیسیر ماهنیلارین بوغازینی سؤک
قایدالاری پوز
یاسالارا قییقاجی باخ!
بو فصیل آغیللاری اویونا چاغیریر،
آخی بو فصیل
یان کئچدی یای-کامان پرده‌سیندن
بو فصیل
ایپ آتدی اویناییر ساری گلین- سؤیودلر
بو فصیل
بیر قادین آسیلدی آوانقارد- شعریندن
اوستو آچیق سطیرلردن
قونچالار قیزاردی نوتلارین اوجاغیندا،
قییدیلار فیدانلارا
اوزدولر سئوینجین کؤکونو تبریزدن
سانکی
ساچما-ساپان بیر رؤیایمیش
شئیطان یووا قورموش آچیشقانین یاراشیغیندا
کئشگه دویمایایدیم!
سئللرین سارایلیغینی
ایزین وئر
انتحار زنجیرینی آیین گولوشونه آسیم،
قوی
آذر قورشاغیندان
اولدوزلار منه گؤز وورسون
کئشگه دویمایایدیم
قودوزلارین آغزیندان داشلانان کؤپوکلر
آچیشقالاری توتوقلایان کؤپکلرمیش!
آخ…
تبریزین دومانی
ییرتدی قانلی کؤینه‌یینی سرحدلرین اوجغاریندا
ساری کؤینکلیم…