آی بؤیوک گؤرسه‌نیر. هئچ زامان اونو بو قده‌ر یاخین، بو قده‌ر قوجامان گؤرمه‌میشدیم. جانیما اوشوتمه دوشور. اوره‌ییمه قورخو اوتورور. دقت‌له باخیرام. سانکی رنگی ده ده‌ییشیکدیر. اؤنجه‌لر گؤردویوم بالاجا آی کیمی گوموشو دئییل. اوستو ماوی، نئچه بؤیوک گوموشو دامارلاری واردیر. نه دن بو قده‌ر اونا یاخینام؟ نه دن او بو قده‌ر یئر کوره‌سینه یاخینلاشیبدیر؟ اطرافیما باخیرام. بو صحنه‌نی پایلاشاجاغیم کیمسه یوخدور. بلکه ده تکجه منه بو قده‌ر یاخین گلیبدیر.
اوزانیرام. سرین بیر اسینتی اوزه‌ریمدن کئچیب، گئدیر. گؤوده‌مه ده‌ین تکجه خوشا گلیم توخونوشدور. بوغدا تارلاسیندا، سونبوللر سسه گلیر، دنیزین دالغالاری‌نین سسینی وئریر. گؤزلریمی یومورام. گؤزومو آچینجا «گئنه او زئرزمیده‌کی دار اوتاقدا، جیر-جیر سس وئرن کؤهنه یاتاغین اسگیلمیش دؤشه‌یی‌نین اوزه‌رینده اولاجاغام» دوشونجه‌سی اوره‌ییمی سیخیر.
گؤزلریمی آچیرام، گئنه قوجامان آی، سانکی اوزه‌ریمه گلیر. بیراز سئوینیرم، بیراز اوشونورم. آیاغا قالخیرام. الیمی بوغدالارا چکیرم، قیزیمین ساچلارینی تومارلاماغیمی خاطیرلاییرام. بوغدالارین اورتاسیندان بیر یول آچیرام. یولو ایتیرمه‌ییم دئیه، تئز-تئز آرخامداکی یئره یاتان بوغدالارا باخیرام. بو یولو من آچیرام، مندن اؤنجه کیمسه بو یولا آیاق قویمامیش. بلکه کیمسه، آیی دا بو قده‌ر قوجامان گؤرمه‌میشدی. بو یول منیم یولومدور. باشیمین اوستونده قوجامان ماوی آی، اؤنومده سه بوغدا تارلاسی. اللریمله بوغدا سونبوللرینی یانا چکیرم. خیش- خیش سس وئریر. بؤیوک بیر ارکسترانی رهبرلیک ائدن بیری‌نین حیسی ووجودومو بورویور. بوتون آجیلاردان اوزاق، بوتون کؤتولوکلردن ایراق…
یولا داوام ائدیرم.
بیردن بیر آغری توپوغوما سانجیلیر. آیین ایشیغیندا منی سانجان نه‌سه، آختارماغا چالیشیرام. آرخاما باخیرام. ساپ-ساری ایلان سونبوللرین اوستونده قیوریلیب، اوزون دیلینی چیخاردیر. گؤزلری پارلاییر. دئیه‌سن منی سانجدیغینا سئوینیر، اونا گؤره ده دیلینی چیخاریب، یاندی- قیندی وئریر.
ایلانلاردان هر زامان قورخموشام. سانجدی‌سا، اؤلوم آرخاسیجا گلر. اؤلوم… هاچاغدان بری آرزو ائتدیییم شئیدیر. آجیلاردان قورتولماغین، بیر یولو. آنجاق بو، قورتولوشون ان راحات یولودور. یوخ! بئله قورتولوش اولماز! نه ائده‌بیله‌رم کی؟ یاردیم ائدن بیری‌سی یوخ! آغزیم آیاغیما چاتماز کی سوموروب، زهری بوشالدام. تک باشیما، آجیلار ایچینده قیوریلیب قالیرام. ساری ایلان گؤره‌وینی یئرینه یئتیریب، گئدیب‌دیر.
آرخامداکی یولا باخیرام. آیین بو غریب ایشیغیندا کیلومترلر یول گلمیشم. داها اینجاریم قالماییبدیر. اوزانیرام، آیا باخیرام‌. ماوی بؤلگه‌لری اوقیانوسا بنزه‌ییر. اوقیانوسلاری فیلیملرده گؤرموشم. گئجه‌لر قورخونج اولسا دا گون ایشیغیندا، بیر اؤلکه‌یه بنزه‌یر. ایسسیز، کیمسه‌سیز بیر اؤلکه. آیین ماوی بؤلگه‌لرینه گئتمه‌ییم گلیر. بیراز داها یاخینلاشسا، منی کهربا کیمی اؤزونه چکه‌بیلر.
گؤزومو آیین بیراز داها یاخینلاشماغی آرزوسو ایله یومورام. آچینجا گؤرورم، بوتون گؤی، آی اولوبدور. منسه یئرله گؤیون آراسیندایام.
آی منی چکیب، آپاریر. اورا دا ابدی بیر یونگوللویه چاتاجاغامی حیس ائدیرم. اورادا، من اولاجاغام. اؤزوم ایسته‌ین کیمی من… باشقالارینی سئویندیرمک اوچون اؤز سئوینجینی ایتیرن من کیمی دییل، اؤزگور بیر من کیمی…
اذان سسی گلیر. تاوانا یاخین پنجره‌دن، ایشیغا باخیرام. آیاغیم آغریییر. اووورام. ساعاتین زنگی، یانیمداکی‌نین خورولتو سسینه قاریشیر. زنگی قاپادیرام. تردن ایسلانان دونومو چیخاردارکن، گوزگوده اؤزومه باخیرام. یاخینلاشیرام، گؤزومون آلتی گؤم-گؤیدو. گئنه ایش یئرینده قادینلار لوغازا قویار کیمی باخیشلاری ایله منی سانجاجاقلار.
ایش پالتارلاریمی گئییب، گئجه‌دن حاضیرلادیغم بلله‌نی چانتاما قویوب، ائودن چیخیرام. خیاوان بوشدو. آی گؤیده‌دیر هله. بالاجا، گوموشو رنگده. اسینتیدن دالغالانان آغاجلارین سسی قارقالارین سسی ایله قاریشیب، بیر نغمه کیمی قولاغیمی اوخشاییر. ایده چیچکلری‌نین عطرینی نفسله‌ییرم. سرویس دوراغینا چاتدیغیمدا، ماوی مینی بوس، ایشیلدایان گوموشو چیراقلاری ایله اوزاقدان گلیر. آیاغیمی مینی بوسون پیلله‌سینه آتارکن آجی جانیمی بورویور. اونا باخمایاراق یئنی بیر گونه آیاق باسیرام.
سون