بوغدانین جنازه‌سین چیینینده داشییان شعریم
تورپاغین ممه‌لریندن داشان سودون
قیسیرلیقدا چورومه‌سین آغلاییر.
آغزیندان بیر قوش اوچان کیمی
قایچی‌نین دیشی قیجیقلانیر
زندانین غیرتی.
بیز اپریمیش بیر گؤزلویون
اسماعیله یازدیغی فرمانی
گونده یوز یول یاشاییریق
مفتیل‌لرین آرخاسیندا
سئوگینین سورگون روایتینده.
آمما چاره‌سیزلیک
اؤلومون قونشوسودور
سسین خاصیت‌سیزلییی.
ایناندین، قورتاردی:
آدام یاواش یاواش
خوشبخت اولار اؤزو بیلمه‌دن
پنجره‌نین باغلی واریانتیندا،
گئجه‌نین محتشم‌لییینده.
۱۴۰۲/۰۶/۰۸
