کئشگه
سسینی داغلارا
نفسینی باغلارا
گؤزللییینی گؤی قورشاغینا پایلاشایدیم!
ایستی اللرینی
سئوگیلی‌لرین ایلک گؤروشونه،
اوره‌یینی
اوغلو ساواشدا یوبانمیش آنانین ساپ-ساری آستاناسینا،
ماویلییینی
دنیزلره قوشایدیم،
سنی دالغالارلا باغلاشایدیم!
آهااااای
ماهنیلاریمین ساری گلینی!
بولودلاردان اوزالدایدین یاغیش الینی،
اولدوزلاردا گؤز وورایدین گولومسه‌ین هیکلینی؛
جالانایدین قاراقانچیل کوره‌میزین
قیسیر دوداقلارینا،
سس سسه وئریب اوخویایدیق اوزای‌لار اوزونو:
«ساچین اوجون هؤرمزلر
گولو قونچا درمزلر…»