توستو دولور یوخومون گؤزونه
دنیزدن ائشیدیلن سینیق سؤزجوک‌لرین
سودا بوغولماسی،
اوشاق بیر گونون
هرجایی کولک پنجه‌سینده
دیدیلیب، اونودولماسی.
چیینیمده داشیدیغیم حیات
مکتبلی گون‌لریمی ایتیردیییم
عیسی‌نین خاچی‌دیر.
یانیلما!
قارشیمدا گوزگو دوران
قورودان آسیلمیش بو یاشیل
الیمین اوشاق الیمدن اوزولمه‌سین یالواریر
گونه باخان‌لارا
اوچورتمالارا.
داریخیب، داریخیب
دیشیمین دیبین ترک ائدن قاداغالار،
یئره گؤیه سیغمایان
یاشلی شکیل‌لرین آدامی،
اوزاقلاشیر گون به گون
گون‌لرین دومانلی داورانیشیندا.
۱۴۰۲/۰۵/۱۲
