پاییز آخشام‌لارینا بنزر
بوینوزلو بیر هده
جالانیب گیلاس آغاجی‌نین آغ چیچه‌یینه
تبریزین تاریخ کیتابینا؛
کیتابین یارالاری دا
دوشوب تعطیل گونه
چیخا بیلمیر ائشییه.
چشمه سویوندا یویولوب
گونه سریلن سهندین گؤیو
یازلی تقویمه رغما
قوجا شه‌هرین آغزیندا داد وئرمیر.
شیطانین بیر دانگی بیزیم طالعیمیزده:
یاغیشین باشین کسیر
چؤره‌یین یولون
دارا چکیر گؤزه للییین دوز ایفاسین
قیزلارین دالغالی ساچیندان
سربست گولوش‌لریندن.
بیر قاناد اوچماغین
بیر مملکت خرجی وار
اوجوز قانادین اؤزودور کی
هر یئریندن دوران
میدان اوخویا بیلیر گؤی‌لرین حؤکمدارینا
ال اوزادا بیلیر
سلاما بنزر چیچک‌لرین حؤرمتینه.
اکدیییمیز گونه باخان‌لار
دنه دولماسا، تعجبلنمه
تقاعده چیخمیش عدالتین
تره‌زیسی بیر گؤزلودور.
۱۴۰۲/۰۳/۱۶
