هردن اؤزومه یالان دئییرم
کپنکلی گون‌لرین گؤی قورشاغیندا
آیاغیم یئردن اوزولور
آخارباخارسیز اولور حیات
یئر کوره‌سی باشدان باشا کؤرپو
آدام‌لار اوشاق
تره‌زی‌لرین گؤزو بیر تارازدا.
دونیانین دروازاسیندان
نه بیر یالان گیریر ایچری
نه خسته‌لیک تؤره‌دن
تولکو ویروسو.
یئنی معنالار یازیلیر
کندیره،
قبیره،
قلمه لرین قلم بارماق‌لارینا.
هردن دئییرم بس
خیاوان‌لار جاوانلاشیب
گونده‌لیک‌لر چیچک پایلاییر اوخوجولارینا
من ده عسگرلره.
هردن یالان دانیشماق
یول آچیر دنیز احوالاتینا
شهرین مهربان قوجاغینا
باشقالیغا.
هردن یالان دانیشین.
27/۰۱/۱۴۰۲
