مرج ائدیرم کی صاباح
گون چیخاجاق
هاوا بیر آز یومشالیب
«گون آیدین!» دئیه‌جک
پئنجه‌یی‌نین آستاری
اوزوندن اوزلو بیر اوغلانین
ایتیردییی ماویلییه.
مرج ائدیرم کی بولود
بیر گون ال چکه‌جک
اورمو گؤلونه
گؤلسوز اورمویا
قاغاییسیزلیق اؤیره‌دن
خائین چیلیس‌لیییندن.
مرج ائدیرم کی
بیته‌جک بو موشتولوقسوز گونلرین اوزون عؤمرو.
سهو ائدیر
دیشی تؤکولموش آیریلیق
تبریزین خیاوانلاری
سئل اولوب سوپوره‌جک بیر گون
بوداغیندا قوش یوواسین قورویان
یارالی چینارلارین گؤوده‌سینده
بالتا – بالتا
اؤلومه قوللوق ائده‌نلری.
مرج ائدیرم من هله ده
پنجره قاباغیندایام.
۰۷/۰۱/۱۴۰۲