گؤزونده یاساق پروازلار آغلاییر
کؤینه‌یی‌نین سول دؤشونده
سورگون هوس‌لر.
داش قالاق اولور گونده یوز یول
گؤوده‌سینه جالانمیش
مرمر ایستک بهانه‌لری.
گولوش‌لرین هاردا سالیب، بیلمه‌سه‌ده
دوداغیندا گیزلی بیر قاداغا
حسرته چئوریلیب.
قاریشقا کؤلگه‌سی وار آلنیندا
گونده گونده حیاتی
داشیییر داغ باشینا
نفسین درمه‌میش آمما
الیندن قورتاریب
دوشور دره‌یه.
سئوگیسی، قوجاغی
دئییردیم
سیله‌جک دونیانین یادداشیندان
اؤپوشسوز علاقه‌لری،
تمیزه چیخاجاق
حوانین طبیعی داورانیشی
نار باغینا دستامازسیز گیرن‌لرین
گؤزو باخا باخا،
قورولاراق
ساچی بایراق اولان گؤزه‌للییین
جمهوریسی.
۲/۱۲/۱۴۰۱