اینانمیرسان اگر
قولاق آس مئشه‌نی دولدوران
یئنی سؤزلره
اوزاقدا دالغالانان بایراق
ایشیق حضرتلری‌نین
یاغیش آدلی مراجعتنامه‌سی‌دیر.
کئچه بیلیب اوددان
آچا بیلیب جادولارین طیلسیمین.
ملک‌لر
ال‌لرینده چیراغ
خوش گلدین دئییرلر
پنجره‌نی خبردار ائده‌ن
سئوگی سوراغلی سردارا.
قوپوز چالینیر،
دده‌م قورقود آد باغیشلاییر ایگیدلره،
پیچاغین تییه‌سین
تورپاغین بوغازینا حرام بیلن ال‌لر
آریدیرلار چای‌لارین گؤزونه دولان داش- قومو،
توفنگیله شعیر یازان طلبه
کؤرپو توخویان ماهنی‌لارلا
گتیردییی گره‌یین مرامنامه‌سین
شام آغاجلاری‌نین قورولتاییندا
اوجادان تقدیم ائله‌ییر.
۱۱/۱۹
