بیزی تاپشیردیز اودونچولارا
زحمتینیز اولماسین دئیه،
دینجله‌سیز بیرآز.
سیله بیلمزلر آمما
پولاد بالتالاریلا سسیمیزی
سؤزجوک‌لره خیانت ائله‌سه‌لر ده
یالانی دوزدن اوجا دانیشسالار دا.
اوشاقلیغیمیزا یول تاپا بیلمزلر
اوغورلاسینلار هئیوالی، نارلی گولوش‌لریمیزی.
خیاوانلاردا چیچکله‌نن آجیق‌لار
بیره یوز اولدوز اولاجاق
گووه‌ن اولاجاق
سونبول اولاجاق.
گولله‌له‌دییینیز چراغ‌لار
گونش اولماقدادیر
بیر ائوی دئییل
بیر وطنی بویاماق ایسته‌ییر
شلاله‌لرین پریشان سرخوشلوغونا.
اودون کیمی یاریرسینیز
اسارته قارشی چیخان
تئل‌لری،
قلم‌لری،
ماهنی‌لاری؛
بونونلا بئله
یاشیل دویغولارین قیزیل اوردوسو
سنگر سنگر
دانیلمازلاشیر.
۸/۱۸
