یول گؤزله‌ییر آنالار،
نه گؤزله‌ییر آنالار
قانلی‌کؤینک‌می یوخسا؟
نه‌دیر باسیب باغرینا عزیزله‌ییر آنالار؟
آخشام اولور اونلارین قولاق‌لاری ایتیلیر،
گؤزلرینده آرزو‌لار
ساچ‌لاریندا آغیر قار
اوره‌ک‌لری نگران
اوزلرینده غم غبار؛
قاپی‌لاری سولاییب، قوش‌لارا دن سپیرلر
گؤیدن دورنا‌لار‌کئچیر گؤروشه تله‌سیرلر؛
قوش‌لار قونوب اوچور‌لار،
آنالار خبر اومور
قوش‌لارا سیرر آچیر‌لار،
بیر سس چیخمیر قوش‌لاردان
نانه یارپاغی‌کیمی
آنالار اینله‌ییرلر، اسیم- اسیم اسیرلر.
آنالار یالقیز، ناچار
تابلاشیر‌لار، دؤزورلر؛
آغیر قارا گونلری تسبیح دنه‌سی‌کیمی
بیر- بیرینه دوزورلر؛
هر نه‌دن بالا دادی، بالا عطری اومور‌لار
هر نغمه ده، هر سؤزده بالا آدی گزیرلر؛
خاطره‌لر قوینوندا،
شن آرزو‌لار ایچینده بعضا ده اوونور‌لار؛
آنالار خیا‌لاردا
بئی اوتاغی بزه‌ییب، گلین ده کؤچورورلر،
آنالار رؤیا‌لاردا قاینانالیق گونونو شادلیقدا‌کئچیریرلر.
قاپی‌لار هئی آچیلیر
قاپی‌لار هئی اؤرتولور
آنا قلبی آچیلمیر
آنا بئلی بوکولور؛
اونلاری بالا دردی گیله- گیله اریدیر،
آنالار گودور
گودور…
یورولماییر آنالار،
گؤزلرینده آرزو‌لار
ساچ‌لاریندا آغیر قار
اوره‌ک‌لری نگران
اوزلرینده غم- غبار
یول گؤزله‌ییرآنا‌لار
یول گؤزله‌ییرآنا‌لار…
– تهران ۱۳۶۴
